Жан-жануар әлемінің жанашыры

Суреттерді түсірген Ерлан ОМАР, «EQ»

Көрменің аты «National Geographic Photo Ark» деп аталды. Аңызда айтылатын жер жаһанды топан су басқанда Нұх пайғамбардың әр жануардың бір түрін сақтап қалу мақсатында кемесіне шығарып, аман алып қалған оқиғасы адамзаттың есінде болса керек. Аппаратын құшақтап, әлемді кезген Джоул Сарторидің бұл жобасы да Нұхтың озық ойын жалғастырғанмен бірдей. Ол түсірген суреттер жай ғана фото емес, жер бетінен мүлдем жойылып кетудің алдында тұрған тіршілік иесінің соңғы бейнесі деуге де толық негіз бар. Олардың ғажайып сұлулығы, тіршілік дәстүрі, тіпті жан дүниесі де сол алақандай аппараттың көзінде сақталып қалмақ. Сирек кездесетін құстарды, балықтар мен сүтқоректілерді, бауырымен жорғалаушыларды, қосмекенділер мен омыртқасыздарды қосқанда, 20 000 түрдің портретін қамтыған жоба адамзатқа ой салмай қой­майды. 

Аталған көрменің ашылу салтанатына қатысқан Мәжіліс депутаты Дархан Мыңбай:«Бүгін Kazmedia Holding компаниясы ұйымдастырып отырған осы «National Geographic Photo Ark» көрмесіне асығып жеттік. Өйткені бұл көрменің миссиясының өзі біздің ұлттық дәстүрімізбен үндес. Қоршаған ортаға, жан-жануарларға құрметпен қарау халқымыздың болмысында бар. Көрменің атауының өзі қазақтың «араша» дегенін білдіреді. Яғни ғасырдың аяғына дейін жоғалып кету қаупі бар жан-жануарлардың фотосуреттерін жұрт назарына ұсынып, араша түсіп отыр», деген ризашылығын білдірді. Сонымен бірге ол «National Geographic» журналының 6 жылдан бері қазақ тілінде жарық көріп, оқырмандарға ой саларлық дүниелер жариялап ке­ле жатқанына алғысын айтты.  

Ал Ғылым және жоғары бі­лім министрі Саясат Нұрбек Джоул Сарторидің жобасының маңыздылығы мен құндылығы туралы айта келе:«Көрменің, жобаның аты өте қызық, Photo Ark, мұндағы Ark дегеніміз – Нұх пайғамбардың кемесі. Бұл жоба біздің болашақ ұрпақтарымыз үшін Алланың жаратқан осы жан-жануарлар дүниесіндегі алуан түрді сақтап қалуға бағытталған. Өйткені қазіргі таңда экономиканың шикізаттық даму моделі өзінің шырқау шегіне жеткен сияқты. Біздің мақсатымыз ішіп-жеу ғана ма? Әлде осы әлемдегі керемет сүйкімді, ғажайып, алуан түрлі жаратылыс иелерін сақтап, үйлесімде өмір сүру ме?  Бір сәтке тоқтап, ойлануымыз керек. Джоул Сарторидің жобасы – «National Geographic Photo Ark» көрмесі осы тұрғыдан аса маңызды», деді министр.

Медиа-менеджер, 31-арна және бірқатар ақпарат құралының  негізін қалаушы кәсіби журналист Арманжан Мерекеұлы өз сөзінде: «БАҚ-тың тағы бір өте маңызды миссиясы бар, ол – құтқару, сақтау, қорғау. «National Geographic» журналының әуелден-ақ миссиясы – планетамызды сақтау, болашақ ұрпаққа қалдыру. Мен осы журналды Еркін Жақыпов бастаған команда қазақ тілінде шығара бастағанда қатты қуандым. Сіздер ұрпақ үшін аса үлкен іс атқарып отырсыздар және оны шын мәнінде келер буын өте жоғары бағалайтын болады деп ойлаймын. Сондықтан бүгін елімізге әкелген әлемдік  «National Geographic Photo Ark»  көрмесінің маңызы тіптен зор», деді.

Бұл жоба болашақ ұрпақтың білімді болып өсуіне, айналадағы заттарды, құбылысты танып-білуіне қозғаушы күш болары анық. «National Geographic» журналының бас редакторы Еркін Жақыпов аталған көрмені өткізудегі мақсат жас буынды, оқушыларды, журналистер мен фототілшілерді жеріміздің ғажайып байлығын сақтауға және осы сияқты ауқымды жобаларды қолдап-қуаттауға шақыру екенін айтты.

Елімізде тұңғыш рет өтіп жатқан бұл жоба осыған дейін АҚШ-тың бірнеше қаласында, соның ішінде Лос-Анжелестегі Annenberg Space for Photography-де, Еуропада – Испанияның Мадридтегі ұлттық музейінде және Азияда – Оңтүстік Ко­реяның Сеул ғылыми орталы­ғында таныстырылған. Көрме Астанадағы Ұлттық музейде 11 қарашадан 4 желтоқсанға дейін жалғасады.