Шымкент қалалық кәсіпкерлік және индустриялық-инновациялық даму басқармасының басшысы Береке Дүйсебековтің айтуынша, 2022-2025 жылдар аралығында 622 млрд теңгеге 66 жобаны іске асыру бойынша арнайы пул жасақталды. Осының аясында 3 жылда 8,3 мың жұмыс орнын құру көзделіп отыр. Соның ішінде 2022 жылы 1 мыңнан астам адамды жаңа жұмыс орнымен қамтамасыз ететін құны 51,4 млрд теңгенің 14 инвестициялық жобасын іске қосу жоспарланған болатын. Бүгінгі таңда жалпы сомасы 29,2 млрд теңгені құрайтын 6 инвестициялық жоба іске асырылды. Соның нәтижесінде жаңадан 520 жұмыс орны ашылды.
Осы жылы іске қосылған жобалардың ішінен «Standard Steel» ЖШС-ның түсті металл концентратын алу үшін қалдықтарды қайта өңдеу қондырғысын атауға болады. «Бұл коммерциялық емес, әлеуметтік жоба» дейді «Стандарт» индустриялық аймағын басқарушы компанияның директоры Азамат Мелдібеков. Өйткені кәсіпорын бұрынғы қорғасын зауытынан тау болып үйіліп қалған қалдықтарды өңдеумен айналысады. Қорғасын зауытының аймағы 118 гектар жерді құрайды. Қазір мұнда жекеменшік «Стандарт» индустриялық аймағы салынып жатыр. 2 млн тонна қорғасын қалдықтарын өңдеу үшін фабрика тұрғызылды. Жылына мұнда 500 мың текше метр қалдық өңделеді. Бес жылда қалдықтар түгел өңделіп бітуге тиіс. Сонда мегаполис қаланың көркін бұзып келген бұрынғы зауыт пен оның аумағындағы зиянды заттардан толық тазаратын болады. Жобаның коммерциялықтан гөрі әлеуметтік салмағы басым деудің сыры да осында. Бүгінгі таңда қалдықтарды өңдеуден алынған мыс концентраты Өзбекстанға экспортталып жатыр. Өз кезегінде Президент Қасым-Жомарт Тоқаевтың өңдеу өнеркәсібіне көңіл бөлу қажеттігі туралы тапсырмасына сәйкес компания өңделген өнімді шикізаттай шетелге сатпай, өзімізде қалдыруды жөн санап отыр. Осыған сәйкес алдағы уақытта қалдықтардан таза мырыш өндіріп, оны отандық «Казцинк» компаниясы сату жоспарда бар. Бұл жобаны іске асыру үшін «Standard Steel» ЖШС арнайы зауыт салып жатыр. Ал өңдеуден кейінгі қалған соңғы қалдықтарды компания қаладағы цемент зауытына өткізбек ниетте. Жалпы, жекеменшік «Стандарт» индустриялық аймағында келешекте қосымша өндірістік ғимараттар мен қоймалар салынады. Олар жергілікті «Іскер қала» бағдарламасы аясында шағын және орта кәсіпкерлік субъектілеріне жалға берілетін болады. Аталған бағдарлама бойынша жалдау құнының бір бөлігін бастапқы жылдары мемлекет кәсіпкерге өтеп беріп отырады.
Сонымен бірге биыл «KAZALPACK» ЖШС-ның алюминий банкілерін өндіру жобасы іске қосылды. Аталған кәсіпорын қала іргесіндегі «Оңтүстік» индустриялық аймағында орналасқан. Бұл сусындарға арналған алюминий банкілері мен қақпақтарды өндіретін Орталық Азиядағы баламасы жоқ кәсіпорын саналады. Жылдық қуаттылығы 500 млн жиынтық. Алюминий құтылары бүгінгі таңда сусындар өндірісінде аса сұранысқа ие және өз кезегінде басқа ыдыстарға қарағанда экологиялық таза болып саналады. Сонымен бірге «Қарапайым заттар экономикасы» мемлекеттік бағдарламасы аясында қаржыландырылған мегаполистегі ең ірі жобалардың бірі. Зауыттың жалпы аумағы 20 мың шаршы метрді құрайды. Сондай-ақ кәсіпорын АҚШ-тың заманауи қондырғысымен жабдықталған. Осы жоба аясында жұқа, қақпағы оңай ашылатын шырынға, түрлі әлсіз, күшті газдалған, алкогольді және алкогольсіз сусындарға арналған алюминий банкілері шығарылу үстінде. Кәсіпорын өнімінің нәтижесінде Қазақстанда алюминий құтыларына қажетті сұраныстың 80 пайызы өтеледі. Бұл өнімнің экологиялық пайдалы жағы да бар. Өйткені әлемде алюминий банкілері ең көп өңделетін әрі табиғи таза ыдыс болып саналады. Мұнымен қоса алюминий банкілерінің жартысынан көбі екінші қайтара өңделіп жатады. Сондықтан қайта өңдеп, түрлі салада қолдана беруге болады. Жаңа кәсіпорын өнім шығарып қана қоймайды, сонымен бірге бюджеттің бүйірін томпайтуға үлесін қосып келеді. Өйткені зауыт мегаполистегі бюджеттік салық төлейтін ең ірі өндіріс ошақтарының қатарында тұр. Сонымен бірге кәсіпорын іргесінің қалануымен 145 адам өзіне тұрақты жұмыс көзін тапты. Өз кезегінде олардың барлығы да ел заңнамасына сәйкес кепілдендірілген әлеуметтік төлемдермен қамтамасыз етілген. Зауыт құрылысын жүргізуге мемлекет тарапынан да қомақты қолдау көрсетілді. Мәселен, «Бизнестің жол картасы-2020» бағдарламасы аясында инженерлік инфрақұрылымы толық жүргізілген жер учаскесі берілді. Сонымен бірге «Қарапайым заттар экономикасы» бағдарламасы бойынша «Даму» кәсіпкерлікті дамыту қоры арқылы 6 пайыздық жеңілдікпен 19,2 млрд теңге несие қарастырылды.
«Mega Smart B2B» ЖШС-ның Жиһаз фабрикасын да биыл іске қосылған табысты жобалардың бірі деуге болады. Аталған кәсіпорынның орналасқан аумағы – «Тассай» индустриялық аймағы. Жобалық қуаттылығы жылына 120 мың жиһаз өндіруге қауқарлы. Жалпы, жобаны жүзеге асыруға 750 млн теңге жұмсалды. Екі гектар аумақты алып жатқан өндіріс ошағында бүгінгі таңда жүз шақты адам еңбек етуде. Компания тарихы 2004 жылдан басталады. 2016 жылы алғашқы жиһаз өндіретін Smart зауыты салынады. 2020 жылы осы зауытта 63 мың дана жиһаз өндіріледі. 2021 жылы мектеп пен кеңселік жиһаздың сериялық өндіріске арналған стандарттары жасалады. Фабрика сонымен бірге МДФ панельдер шығарады. Мұнда мектеп парталары «Прополис» жүйесі бойынша, ал кеңселік жиһаздар Legro сериясымен өндіріледі. Кәсіпорынның коммерциялық директоры Разия Алтаеваның айтуынша, компания ең бірінші кезекте адамдардың жайлылығын ойлайды. Өйткені олар үшін ең басты байлық – адам мен оның құндылықтары. Осы орайда кәсіпорын білікті мамандар даярлап, олардың өз ісін жақсы көруіне көп көңіл бөледі. Smart-та өндіріс қуаттылығы жүйелі жолға қойылған. Өндіріс инновациялық технологияларға негізделген. Мәселен, мұнда Италия, Германияның өте дәлдікпен жұмыс істейтін заманауи қондырғылары орнатылған. Роботтандырылған станоктар арқылы барлық өлшем дәл кесіледі. Компания сапаға аса мән береді. Smart жиһаздарының брендін ішкі нарықта ғана емес, шетелдік тұтынушылар арасында қалыптастыруды қалайды. Өйткені бәсекелестік қызып тұрған бизнес әлемінде қайраңдап қалмаудың бір жолы – сапалы өнім шығару. Сондай-ақ кәсіпорында сервистік жүйе жақсы дамыған. Өнімді жобалау, шығындарын есептеу, болашақ жиһаздың дизайнын жасау, тұтынушыға жеткізіп беруге дейінгі жұмыстар жан-жақты ойластырылған. Бір артықшылығы, Smart өз тауарына 3 жылға дейін кепілдік береді. Мамандар тобының кәсіби шеберлігінің, бизнес пен өндіріс процестерінің дұрыс жолға қойылуының нәтижесінде компания өз өніміне өте ыңғайлы бағалар ұсынады және жеткізіп беруде уақытты көпке созбайды.
«Біз өз ісімізді өте қатты жақсы көреміз. Сондықтан да жұмысты бар ынтамызбен істейміз. Басты мақсатымыз – тұтынушылардың көңілінен шығу. Қай кезде де сапа биігінен түспеуге ұмтыламыз. Осы күнге дейін республиканың түкпір-түкпіріне өнімдерімізді жөнелтіп үлгердік. Осы ретте қазақстандық нарықта бізді танитындар, әріптестік байланыс орнатқысы келетіндер саны артып келеді. Осының өзі компания үшін үлкен мәртебе. Ендігі жоспарымыз – өндіріс ауқымын кеңейту. Өнім түрлерін арттырып, жаңа жобалар мен дизайнға ден қою. Бизнес саласында үнемі дамып отыру маңызды. Өйткені әлем күн сайын өзгеріп жатыр. Бұрынғы талап қазір өзекті болмауы мүмкін. Сондықтан заман көшінен қалмауға тырысу қажет. Әсіресе кәсіпкерлікте бұл өте маңызды», дейді Р.Алтаева.
Жуырда қала әкімі Мұрат Әйтеновтің қатысуымен кезекті инвестициялық штаб отырысы өтті. Онда Шымкентте келесі жылдан бастап жылына 80 мың тонна түйіршіктелген полипропилен өндіретін жаңа зауыттың құрылысы басталатыны айтылды. Нәтижесінде 250 азамат жұмыспен қамтылмақ. Жобаның жалпы құны 38 млрд теңгеге тең.
Шаһар басшысы өз сөзінде үшінші мегаполистің импортқа тәуелділігін азайтып, экспортын көбейту туралы баяндады. Осы бағытта қала экономикасына инвестиция тарту жалғаса береді және сол арқылы жаңадан ашылған жұмыс орындарының қатары да көптеп артады.
Жауапты басқарма басшылары, аудан әкімдері мен инвесторлар қатысқан жиында жалпы 7 жаңа жоба таныстырылды. Атап айтқанда, түркиялық «Stars Cosmetics» ЖШС басшысы Абдулхаким Мухаммадмуса «Оңтүстік» индустриялық аймағынан сұйық сабын өндірісін ашпақ ниетте. 1,5 млрд теңгені құрайтын инвестжобаның қуаттылығы жылына 3 мың тоннаны құрайды. Бұл 2023 жылы жүзеге асырылады. Соның нәтижесінде 30 адам өзіне тұрақты жұмыс табады. Сонымен бірге «Milat Hali» деп аталатын тағы бір түркиялық компания басшысы Искандер Каплан «Оңтүстік» индустриялық аймағынан 2,5 гектар жерге кілем өндіретін зауыт құрылысын салмақ. Жобаның жалпы құны 4,5 млрд теңге болады. Осы жобаның аясында жылына 5 млн шаршы метр кілем өндіріледі. Сонымен бірге аталған кілем фабрикасы арқылы жұмыссыз жүрген 100-ге жуық азамат тұрақты жұмыспен қамтылады. Өз кезегінде «Элмехмонтаж» ЖШС басшысы Ержан Қанатбеков құрылысқа арналған газблоктар шығаратын зауыттың жобасымен таныстырды. Жылына 60 мың текше метр блок шығаратын қуатты өндіріс ошағы «Жұлдыз» индустриялық аймағында орналасады. Жобаның құны 500 млн теңгені құрайды. Нысан құрылысы 2023 жылы салынады деп жоспарлануда. Жоба сәтті жүзеге асып, зауыт жұмысын бастаған жағдайда 20 азамат тұрақты еңбекпен қамтылады.
Штаб отырысында бұдан басқа құрамалы контейнер өндіретін, терезе жақтауларын жасап шығаратын және сантехникалық жиһаздар мен сәулеттік формалар өндіретін инвестициялық жобалар пысықталды. Жоғарыда аталған 3 жоба қолға алынса, қалаға қосымша 1 млрд 200 млн теңге инвестиция тартылып, жалпы саны 75 жұмыс орны ашылады. Мұрат Дүйсенбекұлы ZOOM бейнеконференция арқылы жобалардың әрқайсысымен жеке-жеке танысып, мемлекеттік қолдау түрлері мен қаланың жоғары мүмкіндіктері жайлы мәлімдеді. Сонымен бірге талқылаудан өткен жобалардың барлығын терең зерделеу үшін жетекші сала басшыларына тиісті тапсырмалар жүктеді.
ШЫМКЕНТ
