Қарақат Әбденнің сайлауалды бағдарламасында көрініс тапқан бағыттар – әрбір Қазақстан азаматы үшін өзекті. Олардың қатарында мынадай мәселелер бар: көпбалалы отбасыларға қолдау көрсету; балалар мен жастардың үйлесімді дамуына жағдай жасау, қарияларды қолдауға бағытталған шараларды қолға алу; ұлттық-рухани құндылықтарды дәріптеу; озық білім мен ғылымның, сапалы медицина қызметінің баршаға қолжетімді болуы.
Сайлауалды бағдарламада отбасы институтына баса мән берілген. Кандидат атап өткендей, отбасыны қолдау және нығайту – елдің табысты дамуының кепілі. Себебі отбасында ұрпақ сабақтастығы, үлкендерге құрмет, кішілерге қамқорлық, өзара қолдау дәстүрлері, еңбекқорлық және білімге деген ұмтылыс қалыптасады. Ол отбасы институтын жан-жақты нығайтуға, оның мәртебесін арттыруға мүдделі. Өзінің сайлауалды бағдарламасында кандидат өскелең ұрпақты ұлттық құндылықтар негізінде тәрбиелеу үшін мектеп бағдарламасына арнайы курс енгізуді; студенттердің шәкіртақысын ұлғайтуды; тұрғын үй алуға немесе белгілі бір кезеңге пәтер жалдау ақысын төлеуге берілетін ақшалай сертификаттар жүйесін енгізуді; бала тәрбиелеп отырған үй шаруасындағы әйелді «жұмыскер» деп танып, осы мерзімді еңбек өтіліне қосуды; сирек аурулары бар балаларға көмек көрсету жүйесін біріздендіруді ұсынады.
Бұдан бөлек, сайлаушылармен кездесу барысында Қ.Әбден қоғамның дертіне айналған синтетикалық есірткінің таралуы мен жат мәдениетке еліктегіш жастардың әрекеттеріне ерекше тоқталды. Алдағы уақытта кандидат Жамбыл облысының сайлаушыларымен бірнеше кездесу өткізеді.
Тапсырыс беруші: ҚР Президенттігіне кандидат Қ.Ж.Әбденнің сенімді өкілі А.С.Уразгулов.Мақала ақысы республикалық бюджет қаржысынан төленді. Осы материалды шығарған ұйым, оны басып шығарған жері жəне таралымы туралы мəлімет шығыс деректерінде көрсетілген.
