Еуразиялық экономикалық одаққа бірқатар ірі мемлекеттер кіруге ниетті

АСТАНА. 30 мамыр. Еуразиялық экономикалық одаққа оннан астам ел мүше болуға құмартып отыр. «Нұр Отан» партиясы төрағасының бiрiншi орынбасары Бауыржан Байбек осылай деді. Бұл туралы Bnews.kz хабарлады. Бауыржан Байбектің айтуынша, Түркия, Иран, Жаңа Зеландия, Үндістан елдері бастаған оннан астам мемлекет Еуразиялық экономикалық одаққа қызығушылық білдіріп, мүмкіндік болса, оның құрамына қабылдануға мүдделі екендерін білдіруде. Бұдан біз аталған одақтың тиімді екенін аңғарамыз. «Нұр Отан» партиясы төрағасының бiрiншi орынбасары: «Еуразиялық экономикалық одаққа кіру біздің егемендігімізге нұсқан келтіреді деген мәселе көп көтеріліп жүр. Осы тұста менің айтарым, бүгінгі таңда оннан астам мемлекет Еуразиялық экономикалық одаққа кіруге ниет білдіріп отыр. Атап айтар болсам, Үндістан, Вьетнам, Түркия, Иран, Армения, Қырғызстан, Чили, Жаңа Зеландия және тағы басқалар. Бұл мемлекеттің егемендігіне еш нұсқан келтірместен, еркін саудаға енуге дайын екендіктерін көрсетіп отыр», – деді. Естеріңізге сала кетейік, кеше Астанада Еуразиялық экономикалық одақ құру туралы келісім-шартқа қол қойды. Жолдыбай Базар. Дереккөз: Bnews.kz. Фото: «ҚазАқпарат».