Суреттерді түсірген Юрий Беккер
Қылқаламнан қуаныш тапқан үздік шеберлерді бір алаңда жинаған көрмеде суретшілер әртүрлі жанрда композициялық креативті ой-тұжырымдарын мейлінше айқындап, қазіргі заманның өзекті мәселелерін баяндау арқылы заманауи қазақ кәсіби өнерін жаңа қырынан танытуды мақсат еткен. Қабырғадағы әрбір туынды көркемдік шығармашылықтың бүгінгі деңгейін көрсете отырып, авторлық стиль мен тақырыптық, композициялық концептуалды шешімдердің жолын анықтауға мүмкіндік береді. Бейнелеу мен қолданбалы өнердің барлық жанрын қамтыған экспозиция реалистік, абстракциялық, авангардтық, минимализмдік, концентуалдық мәнердегі өнер иелерінің көркемдік идеяларын кеңінен танытады.
Қаздай тізілген картиналарға көз салсаңыз, әр шығарманың астарынан суретшінің ішкі әлемін көресіз. Ақ пен қараның қайшылығы, күштінің әлсізге көрсеткен өктемдігі, адамзатты тығырыққа тіреген соғыс, жайқалған жасыл дала, қаланың қауырт тіршілігі, әке мен ана бейнесі, еңбек адамдарының маңдай тері, есепсіз достықты ту еткен адал жандар, бәрі-бәрі осында...
Қазақстан Суретшілер одағының кезекті ХІХ съезі қарсаңындағы есеп беру көрмесіне сарапшылар комитетінің шешімі бойынша: Астана, Қарағанды, Павлодар, Көкшетау, Атырау, Ақтау, Ақтөбе, Орал, Өскемен, Тараз, Шымкент, Алматы қалаларынан, Алматы облысынан барлығы 120 суретшінің қолтаңбасы іріктеліп алынған. Көрмедегі 150-ге жуық кескіндеме, графика, мүсін, гобелен, керамика, киіз, кесте өнерінде бедерленген шығармашылық туындылар көз баурайды. Өнер жанашырлары экспозицияны түпнұсқамен қатар онлайн форматта да тамашалай алады.
– Көрменің ерекшелігі, Қазақстанның әрбір өңірінен қатысқан суретшілер өз белсенділіктерін танытты. Алдыңғы толқын аға буыннан бастап ізбасар жас суретшілер өмірлік тәжірибесін, ішкі әлемін, өзіндік тұлғалық мәнерін, креативті тұжырымын, өзгеше өрнектерін ортаға салып, мағыналы да мәнді туындыларын ұсынды. Суретшілердің ұлттық тарихты, мәдениетті, салт-дәстүрді дәріптейтін және бүгінгі таңдағы әлеуметтік тақырыпта сыр шертетін туындылары ой-сананы сан тарапқа жетелейді. Сондай-ақ экспозициядағы әрбір шығарманың композициялық және коллориттік шешімдері, ондағы динамикалық үндестік пен өзара тұтастық уақыт пен кеңістік болмысын дәріптейді. Суретші – әлемінің құбылысын астыртын мәлімдей, көрерменге тіршілік пен қоғам шындығын еркін жеткізетін, әрбір қозғалысты сермей сызып, ондағы тылсым дүниенің болмысын өнер тілімен түсіндіретін жыршы, – дейді көрме жетекшісі, өнертанушы Гүлнар Жұбаниязова.
Заман ағымына қарай суретшi ненi болса да жаңа көзқараспен беруге ұмтылады. Көргені мен түйгенін, уақыт пен замана келбетін, ішкі ой-түйсігін көрерменге дер кезінде жеткізгісі келеді. Кенептегі қоршаған ортаның тепе-теңдік үйлесімі, аңыз бен көне тіршілік тылсымы, адамдардың көңіл күйі сияқты тақырыптық композициялар шынайылығымен құнды. Әсіресе кеше мен бүгінді салыстыра жырлаған жұмыстар – адамзат баласы жаңа мүмкіндіктерді игергенімен ең ізгі құндылықтардан ажырап бара жатқанын айтқысы келетіндей…
АЛМАТЫ
