Сарапшылардың 88 пайызы Еуразиялық экономикалық одақты дамыту керек дейді

АСТАНА. 30 мамыр. Қазақстандықтардың басым бө­лігі еуразиялық интеграция аясындағы өзара ықпалдастықты еліміз үшiн аса маңызды стратегиялық бағдар деп есептейді. Орталық коммуникациялар қызметінде өткен брифингте Еуразиялық интегра­ция институтының директоры Жанаргүл Құсманғалиева осылай деді. Бұл туралы egemen.kz тілшісі хабарлады Ж.Құсманғалиева: «Бiздiң институт тұрақты түрде түрлi әлеуметтiк зерттеулер мен сарапшылардың сауалдамасын жүргiзедi. Әлеуметтiк сауал­даманың нәтижесi жұртшылықтың Еуразиялық экономикалық одақты кеңiнен қолдайтындығын аңғартып отыр. Атап айтар бол­сақ, бiздiң халық Еуразиялық экономикалық одаққа кiру ел дамуының негiзi екендiгiн айтады. Сауалнамаға қатысқан қатардағы қазақстандықтардың 95 пайызы ықпалдастық Қазақстан үшiн аса маңызды стратегиялық бағдар деп есептейдi. Халық пен сарапшылар Еуразиялық интеграцияның келешегiнен зор үмiт күтетiндiгін атаған жөн. Сауалдама қоры­тын­дысы бойынша, оған қатысқан қазақстандықтардың 77 пайызы және сарапшылардың 88 пайызы Еуразиялық экономикалық одақ аясында ықпалдастықты одан әрi дамыту керек деп санайды», – дедi. Еуразиялық интегра­ция институтының директорының айтуынша, сауалнамаға қатыс­қандардың көпшілігі Еуразиялық экономикалық одақ­қа мүше болып отырған Қазақ­стан экономикалық табысқа кенелетiндiгiн білдірген. Жолдыбай Базар. Дереккөз: egemen.kz. Фото: «24kz».