Қасым-Жомарт Тоқаевтың бастамасымен соңғы отыз жылда тоқырап қалған саяси жүйеге жан бітіп, мемлекеттік басқарудың жаңа моделі құрылды. Демократияландыруға бағытталған саяси реформалар легі басталды. Халық қазынасына қол сұққандардың қаражатын қайтару қолға алынды.
Осының бәрін көріп-біліп отырған дана халқымыз Мемлекет басшысына үлкен үміт артып отыр. Ал біздің ел саяси тұрғыдан көзі ашық қана емес, көреген халық. Бұл сөзіме он адамның сегізінің қазіргі Президентті қолдап, дауыс беруі дәлел бола алады. Бұл жолғы саяси додада бұрын мүлде сайлауға бармаған адамдар белсенділік танытты. Осының өзі халықтың бұл сайлауға сенімін, ықыласын айғақтайды. Халық мемлекет құрудағы жауапкершілігін ұғынып отыр.
Халық теріс ойлы азаматтардың түрлі іріткі сөздерінің құнын парықтай алатын деңгейге жетті. Бұл – саяси трансформацияның маңызды жетістігі. Биліктің дұрысын дұрыс, бұрысын бұрыс деп айта алар, қоғам жауапкершілігін мойнына алатын азаматтар тобы қалыптасты. Сол азаматтар тобы да Қасым-Жомарт Тоқаевты қолдау науқанында локомотив рөлін атқарды. Демократия дегеннің ойыңа келгенді айта беру еместігін қоғамның көп бөлігі байқады. Елдің амандығы мен жұрттың тыныштығы ең жоғары құндылық екенін байыптаған азаматтарға тек алғыс айтып қоймай, оларды қолдау қажет. Бірыңғай мақтаудың да, сыдырта жамандаудың да қате бағыт екенін, ондайдың астарында жеке бас мүддесі тұратынын түсінгенде ғана саналы қоғам пайда болады.
Халықтың бұл қолдауы түптеп келгенде, ел тыныштығы мен саяси тұрақтылық үшін берілген мүмкіндік. Ел-жұрт Еуразия құрлығында қандай жанжалдар болып жатқанын, алпауыт елдер тарапынан Қазақстанды түрлі саяси-әскери, дипломатиялық текетірестерге тарту үшін үлкен ойындар жүріп жатқанын бағамдап отыр. Осы бір қым-қуыт кезеңде елді халықаралық шиеленіске ұшыратпауға, жанжал өрті аймағына айналдырмауға Мемлекет басшысының шама-шарқы, қарым-қабілеті, білім-біліктілігі толығымен жетеді деп сеніп отыр.
Бұл сайлау жақсылық боларына сенетін азаматтардың көп екенін көрсетті. Ендеше, халық сенімі ақталсын!
Уайс ЕРСАЙЫНҰЛЫ,
«Аманат» комиссиясының мүшесі, заңгер
