Ерек даусымен елдің ерен қошеметіне бөленген әншіге Лондондағы Ковент-Гарден Корольдік операсы, Нью-Йорктегі Метрополитен операсы, Вена мемлекеттік операсы мен Милан Ла Скаласы, Үлкен театр мен Мария театрлары да ризашылықпен қол соққан. Небір күрделі операларды нәшіне келтіріп шырқайтын әнші даңқ пен марапаттардан да кенде емес.
Хибла Герзмава Алматыда бас дирижер Арман Оразғалиевтің жетекшілігіндегі Astana Ballet оркестрінің сүйемелдеуімен театр салтанаты мен поэзияны қоса паш ететін итальяндық опера жауһарларын орындады.
Дегенмен оның Алматыға келуіне «Сәби» қоры мен танымал зергерлік бренд себепші болғанын айта кету керек. Өйткені осы концерттен түскен барлық қаражат – Атырау қаласында шұғыл балалар хирургиясы бөлімшесінің құрылысына салынады.
«Сәби» қоры құрылғалы бері медицина саласының мұқтаждықтарына болысып келеді. 2018 жылы біздің жоба – Балалар шұғыл хирургиясының құрылысына мұрындық болған еді. Медициналық блоктарды жоғары технологиялық заманауи жабдықтармен толық жабдықтау – қымбат уақытты жоғалтпай, өңірде бірегей оталар жүргізуге мүмкіндік беріп, дер кезінде көрсетілген көмек балалар мүгедектігін айтарлықтай азайтуға септеседі. Қазіргі уақытта «Сәби» қоры Ақтау, Семей, Алматы қалаларында шұғыл хирургиялық көмек бөлімшелерін ашты. Биылғы ақпан айында BVLGARI зергерлік-сағаттық үйінің қолдауымен Петропавлда заманауи медициналық блок салды», дейді «Сәби» қайырымдылық қорының президенті Әсел Тасмағамбетова.
«Неліктен біз бұл «Сәби» қорының жобасын екі жыл бойы қолдап келеміз? Bvlgari үйі сауапты істермен белсенді айналысатын жоғары әлеуметтік жауапкершілікке ие. 13 жыл ішінде арнайы топтамадағы күміс зергерлік бұйымдарды сатудан түскен қаражаттың арқасында 2 миллионнан астам баланың алғысын алдық. Олардың көкейкесті келешегін қамтамасыз ету үшін, білімі мен кәсіби оқуына қаражат жинадық. Ал Қазақстандағы «Сәби» қоры балалардың денсаулығына қарайласады. Бұл да бізге жақын», дейді Bvlgari тобының вице-президенті Лелио Гавацца.
АЛМАТЫ
