Қос тарап екіжақты сауданы дамыту, инвестициялық өзара іс-қимыл және энергетика саласындағы ынтымақтастық мәселелерін, сондай-ақ Қазақстан-Канада Іскерлік кеңесінің қызметін егжей-тегжейлі талқылады.
Премьер-Министр екі ел арасында кешенді сауда-экономикалық әріптестік қарқынды дамып келе жатқанын атап өтті. Мәселен, өткен жылы өзара сауда көлемі 34%-дан астам өсіп, шамамен $500 млн-ды құрады, ал биылғы 9 айда бұл көрсеткіш $730 млн-ға жетті. Сондай-ақ Қазақстан экономикасына тікелей канадалық инвестициялар көлемі де арта түсті, бұл көрсеткіш өткен жылы $385 млн-нан асты.
«Біз инвестициялық ынтымақтастықты одан әрі нығайту және өзара сауда көлемін ұлғайту бағытында әлеуеттің зор екенін көріп отырмыз. Қазақстан экономиканың түрлі секторларындағы өз өнімдерінің 45 түрін жеткізу көлемін $255 млн-ға ұлғайтуға дайын», деп атап өтті Әлихан Смайылов кездесу барысында.
Үкімет басшысының айтуынша, жүк транзиті және жаңартылатын энергия көздерін дамыту салаларында өзара тиімді қарым-қатынастарды дамытудың мүмкіндіктері зор.
Стефан Дион қазақстандық тарапты Президент сайлауының сәтті өтуімен құттықтап, республикада жүргізіліп жатқан әлеуметтік-экономикалық реформаларға қолдау білдірді.
«Бұл – Қазақстан үшін де, әлемдік қоғамдастық үшін де өте маңызды қадам. Осы бағытта бірлесіп жұмыс істеуіміз керек. Атап айтқанда, «таза» сутегіне және басқа да тұрақты отынға көшу қызығушылық тудырып отыр», деді Стефан Дион.
