Көне шаһардың көркіне көзайым болып демалыс маусымын Шымбұлақпен байланыстыратын шетелдіктердің денін Ресей мен Қытай азаматтары құраса керек. Көршілес қос мемлекеттен кейін оңтүстіккореялықтардың үлес салмағы басым. Соңғы екі жылдың үлесіне кіретін бұл статистика әлемдегі күрделі геосаяси жағдайларға байланысты биыл мүлде өзгеруі мүмкін. Есесіне ішкі туризмнің тынысы кеңеймек. Туризм саласының сарапшылары, пандемия белең алғаннан бастап отандастарымыз өз елінің көрікті жерлерінде демалуға ден қойғандарын, осының әсерінен ішкі туризмнің арнасы кеңейгенін айтады.
Биылғы маусымда келушілер жалпы ұзындығы 22 шақырымды құрайтын 20 шаңғы мен шана жолағын пайдалана алады. Жалпы, Шымбұлақ тау шаңғысы курортында ұзындығы 25 шақырым болатын әртүрлі қиыншылықтағы 14 еңіс бар. Осы қыста Шымбұлақта Almaty Extreme Games және Happy Hour Camp фестивальдарын, сондай-ақ фристайл могул және фристайл акробатикасынан 2022/23 жылғы әлем чемпионатының Гранд финалын өткізу жоспарлануда.
Шымбұлақ шатқалына айдындай тайғанақ мұз жолдарын жаны сүйетін шаң-ғышылар, шеберліктерімен таңғалдыратын сноубордшылар көптеп келеді. Себебі бұл жерде арнайы отырғышы бар көтерме жолдармен теңіз деңгейінен 3163 метр биіктіктегі Талғар асуына шығу мүмкіндігі бар. Мұндағы асудан түсетін жер өте тік болғандықтан, кәсіби шаңғышылар үшін арманға қанат бітіретін таптырмас орын. Ал еш жерде қайталанбайтын атмосферадан қала тұрғындары ерекше рухани күш алатынын айтады. Жайлы климат, төбеден төгілген күн шуағы, тұрақты қар жамылғысы Табиғат-ананың таңғажайып сыйы. Табиғат аясында тыныстауға таптырмас орын келушілерін үлкен шаңғы трассасымен тәнті етеді. Бір ғажабы, Шымбұлақтағы қалың қар қабаты желтоқсаннан сәуір айына дейін ерімейді.
АЛМАТЫ
