Жолақысының қымбат болуы басқаны былай қойғанда ата-аналарға оңай соққан жоқ. Бірнеше баласын аудан орталығындағы гимназия мен лицейге оқуға жіберетін луговойлықтар шығынға батқанын ұдайы айтып жүретін. Аудан басшысы Ернар Есіркеповтің бастамасымен өткір мәселе өз шешімін тапты.
Енді екі ауыл ортасында сегіз бірдей автобус қатынайды. Мәселенің оңынан шешілуі үшін «Концерн-Қазқұрылыссити» жауапкершілігі шектеулі серіктестігінің директоры Айтжан Жұмабековпен жергілікті атқарушы билік арасында келісімшарт жасалды. Қоғамдық көлік енді ересектерді 60 теңгелік тарифпен тасымалдаса, оқушылар үшін жолақысы 30 теңге болып бекітілді. Осылайша, маңызды мәселе өз шешімін тапты.
«Бұл мәселені екі ауылдық округ тұрғындарының көтеріп жүргеніне біраз уақыт болды. Расында да, бір үйден бірнеше баланың қатынап оқитынын ескерсек, олардың жолақысы мен тамағына әжептеуір шығын кетеді екен. Ал екі ауылдағы халықтың жалпы саны 30 мыңнан асса, олардың 6 мыңға жуығы мектеп оқушылары екенін айта кеткен жөн. Қысқасы, өткір мәселені дер кезінде шешкеніміз дұрыс болды», дейді аудан әкімі Ернар Есіркепов.
Расында да, Луговойдан Құланға қатынап оқитын оқушылардың қатары басым. Соңғы кездері қымбатшылықтан қаусап қалған жұртшылық қоғамдық көлік мәселесін жиі айта бастаған еді. Жергілікті атқарушы биліктің халық талабына назар аударғаны қуантып отыр.
Жамбыл облысы,
Тұрар Рысқұлов ауданы
