Қоғам • 30 Қараша, 2022

Жүректің көзі ашылса...

78 рет көрсетілді

Ең ғажап суретші – табиғаттың көз тояттайтын сұлу картиналарын күнде көзбен көргенімізбен, кейде көргенді көңілге тоқып, жүрекпен сезіне алмай жатамыз. «Көзінен басқа ойы жоқ» деген Абай өлеңіндей өмір сезімсіз өтіп жатқандай көрінетіні тағы бар. Жүректің көзін жұмуға, сезімін сөндіруге әсте болмайды. Осы мақсатта елордада алғаш рет «Жүрекпен көремін» шығармашылық көрмесі мен қараңғылықта керемет концерт ұйымдастырылды.

Мәдениет және спорт ми­нис­тр­лігінің қолдауымен Тә­уел­сіздік және Халықаралық мүге­дек­тер күніне орай «Ми­рас-А» қайырымдылық қоры­ның ұйымдастыруымен өткен «Жүрекпен көремін» атты шы­ғар­­машылық көрмеге келу­шілер қатары көп.

«Мирас-А» қайырымдылық қорының директоры Кәмшат Үсенқызы «sezin» қайырым­ды­лық жобасының аясында өткен көрменің мақсатын айтып берді. «Жүрекпен көремін» шығар­ма­шылық көрмесінің мақ­саты – келушілердің бойын­дағы уа­­йымынан арылып, суреттерді жү­регімен сезіндіру. Себебі олар алдымен маска кию арқылы су­рет­ті көзбен көрмей, тек аудио­дис­крипциясын тыңдайды. Содан кейін барып елестеткен картинаның бейнесін көре алады», деді ол.

«Бүгін керемет көрменің өте­тінін естіп, қуана жеттім. Іс-шара­ға қатысып, оның әсерін сезінуге келдім. Мұндай маңызды шараларды мемлекет тарапынан болсын, азаматтық қоғам тарапынан болсын қолдауымыз қажет», деді Парламент Мәжілісінің депутаты Мақпал Тәжмағамбетқызы.

Іс-шара барысында елімізге және әлемге танымал суретші, Қазақ ұлттық өнер университеті «Бейнелеу және мүсіндеу» ка­фед­расының доценті Лейла Болатқызының керемет суретіне елестету арқылы бейнесін көру жасалынып, суреттің сол жерде ашылу салтанаты болды.

Аталған көрме әрі қарай айрықша концертке ұласты. Бұл – қараңғыда өтетін жаңа фор­­маттағы жоба. Кеште көз жанарынан ерекше қабілетті жандар арасындағы үздік әншілер музыкалық туындыларын, өмір туралы авторлық шығармаларын сезіммен орындады.

«Нұрдана Арғынұлымен бірге 2019 жылдан бері дуэт болып ән шырқап жүрміз. Концертке қа­тысу үшін Талдықорған қала­сы­нан арнайы келдік. Кон­цертте өзімнің авторлық әндерім мен Нұрданамен «Аңсаймын жарық күнді» әнін шырқап шықтық», деді әнші Алғысбек Дәуенұлы.

Сондай-ақ ілкімді іс-шараға қо­нақ ретінде белгілі әнші­лер, кәсіпкерлер, қоғам қай­рат­­­­керлері қатысты. Кешті ұйым­­­­­дас­­тырушылар шарапатты ша­­­ра­­ның өтуіне қолдау біл­дір­­­ген Мәдениет және спорт ми­нистрлігі және Қазақ ұлттық өнер университетіне ерекше ал­­ғыс­тарын айтты. Келер жылы аталған акцияны республика көле­мінде өткізу көзделіп отыр. Көп адамның жүрек көзінің ашылуына сеп болған іс-шараның расында рухани құндылығы жоғары болды. «Жүректің көзі ашылса, хақтың түсер сәулесі» деп Абай аңсаған сәулелі сәттер сол күні Қазақ ұлттық өнер уни­вер­­си­тетінде қараңғыда жа­рық шашып тұрды. 

Соңғы жаңалықтар

Ұқсас жаңалықтар