Коллажды жасаған Зәуреш Смағұл, «ЕQ»
Халқымыздың арғы-бергі тарихында ел-жұрттың бірлік туының астына ақ ниетпен жиналып, ел тізгінін ұстаған тұлғаның құрметіне ұлықтау рәсімін өткізудің мәні де, маңызы да жоғары болғанын білеміз. Ал осынау жаһандану заманында егемен елдің еңселілігін көрсетіп, дербестігін паш етіп, әлем көз тіккен бас қалада салтанатты түрде ұлықтау рәсімінің жоғары деңгейде өткізілуін – халқымыздың сан ғасырдан бері қалыптасқан салтқа берік болып, бекем бірлік пен көркем тірлікті ұштастыруы деуге болады.
Кешегі сайлауда Қасым-Жомарт Кемелұлы Тоқаевтың ел жұртшылығының үлкен қолдауына ие болып, айқын басымдықпен Қазақстан Президенті болып сайлануы – егемендікті баянды ету жолындағы ең биік белестің бірі. Ел Қасым-Жомарт Кемелұлына елдің қамын ойлайды, намысын жібермейді деп бір ауыздан сенім артты. Бұл – саналы таңдау. Себебі Қасым-Жомарт Тоқаев жүргізіп отырған саясат нәтижелі және жемісті болып отырғаны белгілі. Сол сенім жүгі елді абыройдың биігіне шығарып, өсу мен өркендеуге, жаңару мен жаңғыруға негіз болады деп сенеміз.
Ұлықтау рәсіміне қатысу құрметіне ие болу – мен үшін зор қуаныш әрі ұмытылмас тарихи сәт. Біз Президентті қолдаймыз, оның саясатын, бастамаларын жүзеге асыру жолында аянбай еңбек етеміз. Ел тізгінін қолға алған Мемлекет басшысына шын жүректен абырой-амандық тілеймін! Әділетті Қазақстанды бірге құрып, бірге дамытайық!
Ақтөре ИБРАГИМҰЛЫ,
Қызылорда облысы Сырдария аудандық мәслихатының депутаты
