Бұл күні D тобының матчтарына қарағанда, C квартетінің кездесулері аса тартысты өтіп, жанкүйерлер назарын өзіне аудартты. Өйткені бұл топтағы барлық құрамада келесі кезеңге шығу мүмкіндігі болды. Мәселен, 1/8 кезеңіне жолдама алу үшін Аргентина мен Польшаға тең нәтиже де жеткілікті еді, ал Мексика мен Сауд Арабиясын тек ірі есептегі жеңіс қана қанағаттандыратын. Дегенмен Аргентина Польшаны 2:0 есебімен тізе бүктірсе де, еуропалықтарды өзімен бірге келесі кезеңге алып шықты. Ал қатарлас өткен екінші кездесуде Мексика Саудияны 2:1 есебімен ұтқанымен, «Ацтектер» елі үш турда да өз қақпасына көп гол өткізіп алғандықтан, топтық кезеңде қалып қойды.
Польша құрамасын әлем чемпионатының плей-офф сатысына аргентиналықтардың аяушылығы мен қақпашы Войцех Щенсныйдың ерлігі алып шықты десе де болады. Себебі Аргентина бұл кездесуде Польша қақпасына 13 мәрте дәл соққы бағыттап, соның екеуін ғана голға айналдыра алды. Ал Войцех 11 мәрте сейв жасады. Тіпті ол бірінші таймда Лионель Месси тепкен 11 метрлік айып добын қайтарып, кездесудің соңында матчтың қаһарманына айналды. Егер Месси пенальтиден гол соғып кеткенде, Польша футболшылары чемпионатпен қоштасуы да мүмкін еді. Сонымен қатар Месси бұл сәтсіздігінен кейін әлем чемпионаттарында гол соғу бойынша Марадона, Криштиану Роналду, Ривалдо, Руди Феллер, Адемира және Оскар Мигестердің алдына шығып алу мүмкіндігін пайдалана алмады. Қазір бұл футболшылардың бәрі біріншілікте 8 голдан соққан.
Бұл матчта «Ювентус қақпашысы 1974 жылғы әлем чемпионатындағы отандасы Ян Томашевскидің және 2002 жылғы әлемдік додада өнер көрсеткен америкалық Брэд Фридельдің жетістігін қайталады. Яғни үш қақпашы да бір әлем чемпионатында екі пенальтиді қайтарған.
Екінші таймда Аргентина сапынан Алексис Макаллистер (49-минут) мен Хулиан Альварес (69) мергендігімен көзге түсіп, Аргентинаны келесі кезеңге шығарды. Осылайша, алғашқы турда Сауд Арабиясынан жеңілген аргентиналықтар кейінгі екі матчта алты ұпай олжалап, ол жеңілістің кездейсоқ екенін дәлелдеді. Ал Польша 1986 жылғы әлем біріншілігінен кейін алғаш рет мундиальдың плей-офф сатысына жолдама алды.
Қатардың 500 мыңға жуық тұрғыны бар Лусаил қаласында орналасқан «Лусаил Айконик» стадионындағы екінші матчта Сауд Арабиясы алғашқы турдағыдай сенсация жасай алмады. Арабтардың бірінші турдағы ірі жеңісінен көпшілік жанкүйер оларды бұл топта екінші орынмен келесі кезеңге шығады деп болжаған еді. Бірақ екінші турда Польшадан ұтылған олар соңғы турда да Мексикадан жеңіліп қалды – 2:1.
Екі елдің футболшылары бірінші таймда бір-бірінің қақпасына гол соға алмағанымен, жанкүйерлер екінші таймда үш голдың куәсі болды. Мексика сапынан 48-минутта Энри Мартин, 52-минутта Луис Чавес мергендігімен көзге түсті. Ал матчтың соңғы минутында Сауд Арабиясы құрамасынан Сәлем Әл Давсари нысананы дәл көздеп, осы матчтағы және өз құрамасының әлем біріншілігіндегі соңғы голын соқты. Бір қызығы, «Лусаил Айконик» стадионындағы матчтарда құрамалар үш голдан артық доп соға алмай жатыр. Мәселен, бұл арена бүгінге дейін әлем чемпионатының бес матчын қабылдаса, соның екеуінде – 2:1, қалған үш матчта 2:0 есебі тіркелген екен.
Ал С тобындағы жалғыз жолдаманы Аустралия мен Дания құрамалары сарапқа салып, «жасыл құрлық» өкілдері қатарынан бесінші рет әлем чемпионатының плей-офф кезеңіне жолдама алды – 1:0. Кездесудің тағдырын шешкен жалғыз голды екінші таймның 61-минутында Мэтью Леки салды. Жасыратыны жоқ, екі турда бір-ақ ұпай жинаған Данияға қарағанда бір жеңісі бар аустралиялықтардың келесі кезеңге шығу мүмкіндігі жоғары еді. Десе де, даңқты бапкер Каспер Юльманн жетекшілік ететін Дания құрамасы қарсылатарын тек ірі есеппен жеңген жағдайда ғана 1/8 финалға жолдама алатын. Өкінішке қарай, Дания футболшылары 90 минут бойы допқа иелік етіп, Мэттью Райан қақпасына 13 рет соққы жасағанымен, оның бірде-бірін голға айналдыра алмады. Ал көбірек қорғанысқа көңіл бөліп, қарсы шабуылға иек артқан Азия құрлығының өкілдері бір ғана мүмкіндігін тиімді пайдаланып, Каспер Шмейхель қорғаған қақпадан саңылау тапты. 2018 жылғы әлемдік доданың 1/8 кезеңіне шыққан Дания биыл сол жетістігін қайталай алмай, пұшайман болды.
Келесі кезеңнің жолдамасын мерзімінен бұрын шешіп қойған Франция Тунис құрамасымен өткен ойында алаңға екінші құрамның футболшыларын шығарды. Дидье Дешам осы арқылы негізгі құрамды маңызды матчтар алдында бір тынықтырып алса, алаңға аз шығып жүрген футболшыларға тағы бір мүмкіндік берді. Әйтсе де, әлем чемпионы дейтін дардай атағы бар Франция құрамасында осал футболшының болмайтыны түсінікті ғой. Бірақ кешегі матчта олардың күші Тунисті тізе бүктіруге жетпеді. 58-минуттағы Вахби Хазридің голы Туниске жеңіс сыйлағанымен, келесі кезеңге шығуға жеткіліксіз болды. 90+8 минутта Франция сапынан Антуан Гризманн таразы басын теңестірген еді. Бірақ гол соғылған сәтті видео қайталаудан көрген төреші голды есепке алған жоқ.
Осылайша, С және D топтарының үшінші тур матчтарынан кейін турнирдің 1/8 финалына шыққан тағы төрт құрама анықталды. Сөйтіп, 3 желтоқсанда өтетін плей-офф бәсекесінде Аргентина Аустралиямен, 4 желтоқсандағы матчта Польша Франциямен кездесетін болды.
Сондай-ақ кеше Е тобындағы екі жолдаманы Жапония мен Испания, Коста-Рика мен Германия құрамалары, F тобында Хорватия мен Бельгия, Канада мен Марокко сарапқа салды. Ал бүгін жанкүйерлер G тобындағы Камерун – Бразилия, Сербия – Швейцария және H тобындағы Корея – Португалия, Гана – Уругвай құрамаларының ойындарын тамашалайды. Осы матчтармен биылғы әлем біріншілігінің топтық кезеңіндегі бәсекелер аяқталса, сенбі күні 1/8 финал матчтары басталады.
