Фильмде Қытай коммунистерінің зорлық-зомбылығынан босып Тибет, Үндістан мен Пәкістан арқылы Түркияға жеткен қандастар тағдыры баяндалады. Фильм авторы – Азат Рыстанбек. Кинокартинаны «Отандастар қорының» ұсынысымен «Qazaqstan» ұлттық арнасының шығармашылық тобы Түркияның қазақтар шоғырланған аймақтарында түсірген.
Туындыда Алтайдан Анадолыға ауған он мыңдаған қазақтың көшіне куә болған жандардың естеліктері әсерлі берілген. Сонымен қатар түрік ғалымдарының құнды тарихи зерттеулері де қамтылған. Одан бөлек, 1952 жылы 13 наурызда Түркияның сол кездегі Үкімет басшысы Аднан Мендерестің бастамасымен қабылданған тарихи қаулы туралы да кеңінен айтылады. Азапты жолды көп адам шығынымен артқа тастап, 1952 жылы Түркияға әупірімдеп жеткен 1 852 қазақтың Анадолы жеріндегі жаңа ортаға бейімделуі, тамыр жаюы және қазіргі кездегі жай-күйі – картинаның негізгі мазмұны болған. Шығармашылық топ түсірілім барысында қазақтар алғаш қоныстанған Ыстанбұлдың Зейтінбұрны және Бағжылар ауданына, Ниде аймағындағы Алтай ауылына және Анкара, Измир, Салихлы қалаларына барып, көш куәгерлері Зылиха Қамзақызы, Қалия Әділбекқызы, Арыстан Шәдетұлы, Мансұр Тәйжі және олардың ұрпақтарымен тілдесіп қайтқан.
«Отандастар қоры» КеАҚ президенті Абзал Сапарбекұлы мен «Qazaqstan» ұлттық арнасының Басқарма төрайымы Ләззат Танысбайдың айтуынша, фильм кейінгі буынға ұлт тарихындағы ең ұзақ, ең азапты көштің мәнін түсіндіру, қандастарымызға құрмет білдіру мақсатында түсірілген.
Сондай-ақ картина ұлт тарихындағы айтулы көштің 70 жылдығына және Қазақстан мен Түркия арасындағы дипломатиялық қарым-қатынастың 30 жылдығына арналған. Деректі фильм «Qazaqstan» ұлттық арнасынан Тәуелсіздік күні қарсаңында көрсетіледі.
