Жақында қазақтың абыройын асқақтатқан желаяқ Әмин Тұяқовқа «Атырау облысының құрметті азаматы» атағы берілді. Мұнайлы өңір жұртшылығы да желдей ескен даңқты желаяққа көрсетілген бұл құрметті жылы қабылдады. Өйткені ол 100 және 200 метр қашықтыққа жүгіруден, 100х4, 200х4 эстафетаға жүгіруден 8 рет КСРО чемпионы атанған. Мұның сыртында жеңіл атлеттен иеленген 10 күміс, қола медалі бар.
Желдей жүйрік желаяқ 1967 жылы КСРО халықтарының IV спартакиадасында 200 метрлік қашықтықта алтын, 100 метрге жүгіруден күміс медальға ие болған. Оның есімі шетелге де кеңінен танылды. Соның дәлеліндей, 1965 жылы Еуропа кубогінің жеңімпазы, бір жылдан соң Еуропа біріншілігінің күміс жүлдегері атанды. Бұған қоса 50-ге жуық халықаралық жарыста бағы жанып, жеңістің биік шыңына көтерілді.
– «Қазақтың желаяғы» деген атақ кез келген адамның маңдайына бұйыра бермейді. Алаш қайраткері Әлихан Бөкейхановтың «Ұлтқа қызмет ету білімнен емес, мінезден» дегеніндей, спортта да намыс пен мінез болмаса, жетістікке жету қиын. Дәл осы қасиет Әмин ағамыздың бойынан табылып, аламан жарыстарда жеңіс тұғырынан көрінді. «Мен қазаққа ортақпын» деп жастарды бөлінуге емес, бірігуге шақырды. Жас буын да, спортшылар да даңқты желаяқтың өнегесін үлгі тұтады, – деді облыс әкімі Серік Шәпкенов.
Атырау облысы
