Жөндеуші тапшы

Қазір көмірлі шаһарда проблема туындап тұрған көпқабатты 70-тен астам үй бар. Жөндеу бри­­га­далары әр тұрғын үй үшін күні-түні жанталасып, ішіне мұз қатқан құбырларды жібітуге түрлі әдіс қолдануда. Төтенше жағдай қыз­метінің арнайы жылытқыш қондырғылары жертөлелер мен подъездер ішіне үлкен құбырлар ен­гізіп, ғимараттарды жылытуға тырысып жүр. Алайда кешелі-бері қыса түскен аяз қалпына келтіру жұмыстарына айтарлықтай кедергі келтіруде.

Мәшһүр Жүсіп көшесі, №46 үй тұрғыны Лариса Пузикова 9 тәуліктен бері жылусыз отырғанын айтады. Ал Сәтбаев көшесі, №8 үйде тұра­тын Людмила Казанцева есімді екі­бастұздық ана үй иелерінің амалдары әбден құрығанын, пәтер ішіндегі температура нөлден тө­мен болып тұрғанын жеткізді. «Тұр­мыс­тық техникаларымыз қатып қалған, электр желісіне қосуға мүлде жарамай­ды. Электр жарығы қайта-қайта сөнеді», деді ол.

Екібастұзда апат басталмас бұ­рын жылу параметрлері түсіп кеткен бас­паналар да бар болып шықты. Мәселен, Энергетиктер көшесі, 83 мекенжайындағы көпқабатты үй 25 қарашадан бері қиын жағдайда тұр. Шаһарда кешенді апат орын алған күні үй иелері құбырлардағы суды ағызып жіберген. Жөндеу бригадаларына берілген тізімде бұл үй жоқ. «Шұғыл желіге» хабарласса, ондағылар жөндеу бригадаларының жетіспейтінін айтқан.

Апатты қалпына келтіру жөнін­дегі жедел штабтың есебіне сүйенсек, барлығы талапқа сай қосылып жатыр. Әлгіндей үйлер тіпті аталмайды. Мәселен, жедел штабтың жетекшісі, Премьер-Министрдің бірінші орынбасары Роман Скляр кеше жоғарыда аталған 70-тен астам үйдің жылыту тораптарында жөндеу жұмыстары аяқталғанын хабарлады. Қазір пәтерлердің ішіндегі құбырлар мен регистрлерді қосу жүріп жатыр. Сонымен қатар мамандар су және кәріз жүйелерін қалпына кел­тіруде. Жөндеу-қалпына келтіру жұмыстарына жалпы саны 851 адам жұмылдырылған.

– Апат салдарынан жылудан ажырап қалған барлық үйдің жертө­ле­сіне дейін жылу кіргізілді, жылу айналымы қалпына келе бастады. Жөндеу бригадалары жексенбі күні кешкі 20.00-ге дейін үйлердің ішіндегі 850 жылу батареяларын айырбастады. Стансада ысырап болып жатқан су көлемі шамамен 360 тонна, кәсіпорын бұған қосымша тағы 350 тоннадай жоғалтып отыр. Өкінішке қарай, кейбір үйлерде ПИК-тер тиісті шараларды уақтылы атқармай, соның салдарынан жүйе­лер аязда қатып қалған. Қазір Сәтбаев көшесі, 8 үй, Мәшһүр Жүсіп көшесі, 52 үй, Әуезов көшесіндегі №47, 46, 46А, Шешембеков көшесі, 19А үйлерінде қиындық туындауда. Штаб жетекшісі, Үкімет бас­шы­сы­ның бірінші орынбасары Роман Склярдың тапсырмасымен әр үйге белгілі бір кәсіпорындар бекітілді. Әлгі кәсіпорындардың басшылары қалпына келтіру жұмыс­та­ры­ның басы-қасында өздері жүр. Бұл жағдай барлық зақымдану толық қалпына келтірілгенше сақта­лады. Үйлерді жылуға қосу жақын уа­қыт­та аяқталады деп отырмыз, – деді Павлодар облысы әкімінің мін­де­тін уақытша атқарушы Олег Крук бұрнағы күні өткен брифингте.

Штаб өкілдері апатты жою шара­ларына белсенді атсалысып жатқан «САЭМ» компаниясына, «Шығыс» кеніші, МАЭС-1, МАЭС-2 стансаларына, «Бозшакөл» КБК-ға, «Богатырь Көмір» және КЕГОК кәсіпорындарының басшылығына, сондай-ақ өз жұмысын адал атқарып жүрген ПИК-тердің өкілдеріне алғыс­тарын білдірді. Аязда тұрғын­дар мен жөндеу бригадаларына ыстық шай мен ас-ауқат тасып жүр­ген еріктілердің еңбегі де мақ­тау­ға лайық.

Қала басшысы Аян Бейсекиннің айтуынша, апаттан зардап шеккен тұрғындардың барлық шы­ғы­нын өтеуді «Орталық Азия Элек­тро­­­энергетикалық Корпо­ра­ция­сы» АҚ өз міндетіне алып отыр. Жөндеу жұмыстарында пайдаланылып жатқан құбырлар мен радиаторлар негізінен аталған АҚ-ның және демеу­шілердің есебінен сатып алыныпты. Барлық көпқабатты тұрғын үйлердің жылу тораптары қалпына келген соң жөндеу бригадалары суық су құбырларын жібітуге және жүйелері қатып жатқан 70 жеке үйдің құбырларын реттеуге аттанады. Бұған қоса ОЖП-52 нысанына және өзге де магистральдарға қосылған бірнеше әлеуметтік ны­санның жүйелерін дұрыстау көзделіп отыр.

«Екібастұз жылу-энерго» ЖШС-ның басшылығы кеше түске қарай станса штатты режімде жұмыс істеп тұрғанын, жылу тасымал­да­ғыштардағы судың температурасы 87, айналымдағы су 59 градус екенін мәлімдеді. Бұрнағы күні түнде Екібастұзға 4 мың жылу радиаторы мен 20 мың метр болат құбырлар тиелген 15 жүк көлігі жетті. Тағы 2 мың радиатор кеше әкелінді. Бұл материалдар магистральдағы, орамішілік және үйішілік жүйелерді ауыстыруға пайдаланылады. Бұдан басқа дәне­керлеу жұмыстарын жүргізу үшін қосымша электродтар, тегістегіштер, жылуоқшаулағыш, рубероид, ысырмалар сатып алын­ған.

Мамандар Екібастұздағы жағ­дай­ды толық ретке келтіру әлі біраз уақытты талап ететінін айтып отыр.

Павлодар облысы,

Екібастұз қаласы