Апатты жою жөніндегі штаб басшысы – ҚР Премьер-Министрінің бірінші орынбасары Роман Склярдың шешімімен 5А шағын ауданында жаңадан жалпы ұзындығы 120 метр жылу құбыры салынады.
«Бұл орамдағы желілерде зақымданулар көп кездесуі себепті белгілі бір учаскеде жаңадан желі салуға шешім қабылданды. Штаб құбырды жердің бетімен төсеуді құп көріп отыр. Осылайша бұл жердегі магистральге қосылған үйлерді жылудан уақытша ажырату көп уақытты алмайды, небәрі 5 сағатты құрайды. Мамандар есептегендей, егер жердің астымен жүргізсек, тұрғын үйлерді шамамен 20 сағаттай жылудан айыруға тура келер еді. Себебі жердің астында бұған дейін пайдаланылған құбырларды толықтай кесіп алу қажет болады. Қазір дайындық шаралары басталып кетті», деп хабарлады бүгін кешкі сағат 20.00-де Павлодар облысы әкімінің міндетін атқарушы Олег Крук.
Атап өтерлігі, қазіргі уақытта жылуға қосылмаған 6 подъезд ғана қалды. Ол Мәшһүр Жүсіп көшесі, 52-үйде орналасқан. 20 подъезден тұратын үйдің 14 подъезіндегі пәтерлердің құбырына қазір жылу жіберілді. Өзге пәтерлерді реттеуді ертең таңертеңгі 8.00-ге дейін аяқтау жоспарланып отыр.
Жалпы жөндеу бригадалары Сәтбаев көшесі, №8 және Мәшһүр Жүсіп көшесі, №52-тұрғын үйлерге жылу кіргізуде үлкен қиындықтарға ұрыныпты. Себебі мұндағы барлық пәтерлердің жылу батареялары мен ішкі құбырлары аязда толықтай қатып қалған.
«Орталық-Азия Электроэнергетикалық Корпорациясы» (ОАЭК) АҚ басқарма төрағасы Бағдат Оралдың сөзінше, компания апатты қалпына келтіру шараларына қазірдің өзінде 891 млн теңге бөлген. Апат аймағында болған үйлер бойынша қараша және желтоқсан айлары үшін жылу төлемақысы қайта есептеледі.
Екібастұздағы жылу желілерінің - 91, су құбырларының - 66, кәріз жүйесінің 60 пайыздан астамы тозып тұр. Тек жылу желілері бойынша көнерген аумақтардың 30 пайызын жаңарту үшін кемінде 120 млрд теңге қаражат қажет көрінеді. «ОАЭК» бұл ретте бюджет қаражатынан дәмеленіп отыр.
