Екіншіден, азаттық – ғасырлар бойы аңсаған арманымыз еді. 1990 жылы 25 қазандағы Егемендік декларациясы, 1991 жылы 16 желтоқсанда әлемге жария еткен тәуелсіздігіміз баянды болсын. Ертеде «еңбектеген баладан еңкейген кәріге дейін» деуші еді, сол айтқандай, бәріміз Қазақстан үшін қызмет етейік.
Үшіншіден, Желтоқсан – қастерлі және қасиетті ай. Алаш автономиясының желтоқсаны, Қазақ автономиялық республикасының желтоқсаны, тоталитарлық кеңес билігінің іргесін шайқаған Желтоқсан көтерілісі – тарихтың жарқын беті. Мен «Азаттық жолында шейіт кеткен ата-бабамыздың, аға-апамыздың, замандастарымның, іні-қарындастарымның, балаларым мен немерелерім құралыптас жастардың алды – пейіш, арты кеніш болсын!» деймін.
Қазақстанның дəулеті таса берсін,
Дұшпаны қырдан үркіп қаша берсін.
Әділет пен ар-намыс серік болып,
Құдайым ел маңдайын аша берсін!
Досмұхамед Кішібеков,
97 жастағы майдангер,
ҰҒА академигі
