Қазан айынан бері Астана мен Алматы қалаларының мектептерінде бастауыш сынып оқушыларына арналған аспаздық шеберлік байқаулары өтіп жатыр. Келешек ұрпақтың денсаулығын сақтауға бағытталған бастамалардың қай-қайсысы да қолдау мен назар аударуды қажет ететіндіктен, Алматы қаласындағы №52 жалпы білім беретін мектепке бас аспаз өткізген шеберлік сабағына келдік.
Бұл жолы «Салауатты тамақтану мектебі» білім беру бағдарламасы аясында өткен дәріске 3-сынып оқушылары ата-аналарымен бірге қатысты. Айтқандай, іс-шараға 2030 жылға дейін дүние жүзіндегі 50 млн-ға дейін баланы дұрыс тамақтануға дағдыландыруға бастамашы болып отырған «Нестле Қазақстан» мен Алматы қалалық білім берудегі жаңа технологиялар ғылыми-әдістемелік орталығы ұйытқы болды.
Білім берудегі жаңа технологиялар қалалық ғылыми-әдістемелік орталығының бөлім басшысы Татьяна Ежова балаларды дұрыс тамақтануға әдеттендіру туралы айта келе: «Бағдарлама барынша жеңіл болғандықтан, балалар пайдалы тағамдар, дәрумендер, диета құру негіздерін білуге ықыласпен ұмтылады», дейді. Ал «Нестле» білім беру бағдарламалары бөлімінің басшысы, педагогика ғылымдарының кандидаты Александра Макеева «Салауатты тамақтану мектебі» білім беру бағдарламасы өзінің 10 жылдығына қадам басып келе жатқанына тоқтала келе: «Осы ауқымды жобаның аясында тағы бір қосымша бастаманы қолға алдық. Балалар сабақтан тыс уақытта мектепте немесе үйде бас аспаздар жүргізген онлайн шеберлік-дәрістері арқылы денсаулыққа пайдалы тағамдар әзірлеп, конкурс платформасына орналастырады. Біріншіден, бұл тағамдардың дайындалуы өте қарапайым, екіншіден өте пайдалы, үшіншіден дәмді әрі көңілді. Кейін балаларға өмір бойы қажет болатын ойын түріндегі байқау желтоқсан айында аяқталады. Әрине, жеңімпаздар марапатталады. Ең қызығы, бағдарламаға тартылған оқушылар үйде әке-шешелерін дұрыс тамақтана білуге үйретеді екен», дейді.
АЛМАТЫ
