Мұнда заманға сай базар ғимараты, азық-түлік қоймасы және далада сауда павильондары орналасқан. Әр сенбі сайын өңірдегі шаруашылықтар жиналып, жәрмеңке өткізеді. Ал жабық базардың өзі аптаның 6 күнінде жұмыс істеп, тұтынушыларға азық-түлік тауарларын жергілікті нарықтағыдан 15-20 пайызға арзанға сатады. Сауда орындарын жалға алатын кәсіпкерлер шаршы метрі үшін айына небәрі 2000 теңге төлейді екен. Мұндай жеңілдік азық-түлік өндіру саласындағы ірі өндірушілер мен танымал брендтерді қызықтырып отырғанға ұқсайды. Қазірдің өзінде іштегі орындарға 32 кәсіпкер жайғасып үлгеріпті.
«Jailau» базарының ашылу күні 8 ауданның шаруалары өз өнімдерін тікелей саудалап, тұрғындарды ауылдың берекесіне қарық қылды. Картоп пен қырыққабат, сәбіздің килосы 95 теңгеден, бірінші сұрыпты жұмыртқаның ондығы - 450, сүттің литрі 170 теңгеден босатылды. Жәрмеңкеде ет те арзан, сиырдың жұмсақ еті мен қойдың жамбасы - 2000, жылқының қазысы 2300 теңгеден сатылып жатқанын байқадық. Жарма өнімдері, күнбағыс майы, тауық және қаз еттері, жоғары сұрыпты ұн, құрт-қаймақ, сары майдың түр-түрі сөрелерде самсап, жұрт таласа-тармаса сатып алды.
