Алып жердің маңызды бір бөлшегі саналатын Тынық мұхитында домбыра бейнесінде үлкен көпір салынғанын осы жұрттың бірі білсе, бірі білмес. Оның құрылысын жобалаған – Өрлеухан Қисаұлы есімді шетелдегі қандасымыз. Оның табанды ізденісі ақыры үлкен жетістікке жол ашты. Тынық мұхитының кіреберісіне орналасқан Гонконг, Макао, Джухай сияқты үш ірі қаланы бір-біріне тұтастырып тұрған домбыра пішінді көпір бұл күндері әлем жұртшылығының таңдайын қақтырады.
Аталған көпір жобасы 2009 жылдың аяғында басталған. Алып көпірді аяқтауға тоғыз жыл уақыт кетіпті. Құрылыс жол, туннель және жасанды арал сияқты үш үлкен бөліктен тұрады. Ал жол алты бөліктен құралған. Жалпы ұзындығы 55 шақырым, оның 38 шақырымы көпір болып табылады. Ұлтымыздың ұлы аспабы бейнеленген көпірдің 7 шақырымы мұхит астынан өтетін туннелдерден тұрады.
Қазақ сәулетшісінің қолынан шыққан алып нысан пайдалануға берілген соң, Гонконг пен Джухай қалалары арасындағы үш сағаттық жол уақыты небәрі жарты сағатқа қысқарған. Бір ғажабы, құрылыстың маңызды бөлігі саналатын туннелдер су астында 48 метр тереңдікте орналасқан. Аталған жобаға әлемдегі таңдаулы құрылыстарды салған Лондон қаласында орналасқан «Arup Group» компаниясы.
Архитектор Өрлеухан Қисаұлы Қытайға қарасты Алтай аймағында дүниеге келген. Италия техникалық университетінің магистрі. Жапониядағы Шығыс университетінде архитектор мамандығы бойынша докторлық диссертация қорғаған. Өзі жобалаған домбыра бейнелі көпір пайдалануға берілген сәтте ол: «Бұл домбыра көпірдің ғұмыры 120 жыл деп есептедік, техникалық бақылау жұмыстарын арттыру арқылы оның шыдамдылығын 150 жылға дейін ұзартуға болады» деген ойын жеткізген.
Иә, әлемнің әр шетінде өз саласында табыс жаратып, үлкен жетістіктерге жеткен қазақ қанды ағайын баршылық. Үлкен жобаны бастарда ата-бабасының сан ғасырлық сыры мен мұңы, бүкіл өмірі жазылған қасиетті домбыраның бейнесін ұлы мұхитты кесіп өтіп, үлкен шаһарларды бір-біріне жалғаған алып көпірге айналдыру Өрлеухандай азаматтың алдағы асулары бұдан да биік екенін көрсетсе керек.
