Бұл Астанадағы «Барыс аренада» өткен «Біз біргеміз Fest» атты музыкалық қайырымдылық фестивалінен көрініс еді. Онда Димаш Құдайбергенмен бірге басқа да қазақстандық эстрада жұлдыздары мен мүгедектігі бар әртістер өнерлерін ортаға салды. Мұқтаж жандарға пәтер кілті табысталғанда, «Барыста» мейірім мен қайырымға куә болдық. 12 мың адам сыятын «Барыс арена» лық толмаса да, халық атшаптырым алаңның жарымынан көбін алып отырды.
Қайырымдылық концертке өнерпаздар республиканың түкпір-түкпірінен тартылыпты. Дарынды балалар мен мүмкіндігі шектеулі жастар еліміздің барлық өңірінен келіпті. Балалар жылы аясында ұйымдастырылған фестиваль ерекше қажеттіліктері бар балаларды қолдауға арналғаны осыдан-ақ белгілі.
Іс-шараға Парламент Сенатының төрағасы Мәулен Әшімбаев қатысты. Сенат төрағасы Мемлекет басшысының тапсырмасы бойынша елімізде халықтың әлеуметтік осал топтарын қолдау үшін барлық шара қабылданатынын атап өтті. «Белгілі отандық өнерпаздармен бір сахнада өнер көрсету ерекше әрі жас талант иелерін ынталандыра түсетіні анық. Әншілерге шығармашылық табыс тілеймін. Бүгінгі концерттен жиналған қаражат мүгедектігі бар балаларға арналған оңалту орталығына жабдық сатып алуға жұмсалады. Мұның бәрі өнер кез келген кедергі мен таптаурындарды бұзып, игі істер жолында барлығын біріктіре түсетінін көрсетеді», деді Мәулен Әшімбаев.
Концерт барысында мүмкіндігі шектеулі әнші Кенжебек Нұрдолдайға екібөлмелі пәтердің кілті тапсырылды. Жеті айлық баласымен қалған жалғызбасты ана Әсел Омарова да Астанадан бір бөлмелі пәтердің кілтіне ие болды. Оған демеушілік еткен бірнеше компания, ірі бизнес орталықтарына ұйымдастырушы Перизат Қайрат ханым алғыс білдірді.
Фестиваль аясында Кенжебек Нұрдолдай, «Sensitive» би тобы, Алтыншаш Мұқатаева сынды ерекше қажеттілігі бар музыканттар мен бишілер өнер көрсетті. Сондай-ақ әйгілі әнші Димаш Құдайберген, эстрада жұлдыздары Тамара Асар, Назима, «Бастау» тобы, Айдын және тағы басқалары өнерлерін көрермен назарына ұсынды.
Іс-шараны «Biz birgemiz, Qazaqstan» қоғамдық қоры және Астана қаласының әкімдігі ұйымдастырды.
