Аталған банк тек аяқталып келе жатқан жылда 80 мыңға жуық отбасының қоныс тойына жетуіне септесті. Яғни 2022 жылы осыншама шаңырақтың тұрғын үй мәселесін шешуге заем берілді. Сондай-ақ биыл 600 719 адам «Отбасы банктен» жаңа депозит ашқан. Бүгінгі таңда банктің жалпы депозиттік портфелі 2 трлн теңгеге тең.
Осылайша, жылдың өне бойында мыңдаған отандасымызды арманына жеткізген «Отбасы банктің» бітірген шаруаларына шолу жасайтын дәстүрімізге биыл да оралдық.
Тек биылдың өзінде банктің 80 мыңға жуық клиенті қуанышты күнге жетсе, оның ішінде мемлекеттік бағдарламалар аясында кезекте тұрған 10 518 адам «Отбасы банк» көмегімен үйлі болды. «Бақытты отбасы» бағдарламасы арқылы 1 247 қазақстандықтың баспана мәселесі шешілді. «Шаңырақ» бағдарламасымен – 5 989 отбасы, «Нұрлы жер» бағдарламасының арқасында 3 282 отбасы өз баспаналарына қол жеткізді.
Бүгінгі таңда «Отбасы банк» ұзақмерзімді депозиттер нарығында бірінші орынға шықты. Қазір банктің 2,5 млн салымшысы қаражат жинап жатыр. Күн сайын банкте 2 мыңға жуық жаңа депозит ашылады. Келешекте олар алғашқы жарнаға қажетті соманы жинап, жылдық 3,5%-дан (ЖТСМ 3,6% бастап) 11,5%-ға (ЖТСМ 11,2% бастап) дейінгі мөлшерлемемен несие ала алады.
Ипотека нарығында да «Отбасы банк» көш бастап тұр. Жыл қорытындысына көз салатын болсақ, банк қазақстандық жалпы ипотека үлесінің 67%-ын берген. Бұл ретте банк NPL-дің ең төменгі деңгейін (мерзімі 90 күннен асып кеткен қарыздар) сақтап қалды, қазір ол 0,08%, ал банктер арасындағы бұл көрсеткіштің орташа деңгейі 3,68%-ға тең. Ең бастысы – тұрғын үй құрылыс жинақ жүйесіне деген халықтың сенімі ұлғайған сайын банк клиенттерінің қатары мен қаржылық операциялар саны да артып келеді. Сондықтан қазір банктік процестердің дені толықтай цифрландырылып, онлайн режімге көшіріліп жатыр.
– Биыл онлайн арналар көмегімен 2,5 млн операция жасадық. Жұрттың уақытын үнемдеу үшін алдымызға үлкен мақсат қойып, 2025 жылға дейін банк ұсынатын барлық операцияны клиенттерге онлайн режімде қолжетімді етуді көздеп отырмыз. ЕДБ-ның ішінде Вlockchain жүйесін алғашқылардың бірі болып енгіздік. Аталған технологияны пайдалана отырып, банк клиенттері несиені мерзімінен бұрын өтеген жағдайда бірнеше минут ішінде кепіл шартын қашықтан тіркей алады немесе кепілде тұрған жылжымайтын мүлікке тіркелген құқықтарды алып тастай алады. Бүгінгі таңда Blockchain 500 мыңнан астам сағатты үнемдеп, «Отбасы банктің» 30 мыңға жуық клиентіне қашықтықтан сұранысқа ие қызметтерді қолдануға көмектесті, – дейді «Отбасы банк» АҚ басқарма төрағасы Ләззат Ибрагимова.
Жаңа технологиялар қысқа мерзімде Жалға алу ақысын онлайн субсидиялау бағдарламасын жылдам іске қосуға көмектесті. Президент Қасым-Жомарт Тоқаевтың пәрменімен «Отбасы банк» жоба операторы ретінде айқындалғаны аян. Халыққа ыңғайлы болу үшін өтініш беру, бағдарлама шарттарына сәйкестігін тексеру, жалға берушімен келісімшарт жасау мен 50% көлеміндегі субсидия алу процестері otbasybank.kz цифрлы платформасында жүзеге асырылып жатыр. Осы порталдан адамдар баспана таңдап, мемлекеттік бағдарламаларға қатысуға өтініш жолдай алады. Банктің жеке бағдарламалары аясында құрылыс салушыдан немесе екінші нарықтан ең жақсы пәтерлерді таңдап, сатып ала алады. Күн сайын платформаға шамамен 6 мың адам кіреді.
Сондай-ақ otbasybank.kz сайты арқылы онлайн-ипотекаға да өтініш беруге болады. Бұл опцияны қазірдің өзінде 1 800 адам пайдаланып үлгерген.
2022 жылдың 1 қазанынан бастап банк өз клиенттерінен өтемақы алуға өтініштер қабылдай бастады. Қолданушыларға ыңғайлы болу үшін бұл процесс онлайн режімде іске қосылды. 2022 жылдың 26 желтоқсанындағы жағдай бойынша, қазақстандықтардан жалпы сомасы 114 млрд теңгені құрайтын өтемақы алуға 814 мыңнан астам өтініш келіп түскен.
Биыл «Отбасы банктің» сәтімен жүзеге асқан бірқатар жеке бағдарламасы бар десек, оның ішінде «Ұмай» әйелдер ипотекасы 1 350 қазақстандық қыз-келіншектің үй мәселесін шешіп берді.
Өтіп бара жатқан жыл өңірлердегі жас мамандарды баспанамен қамту ісінде де серпінді болды. Жастар бағдарламаларын жүзеге асырудағы жергілікті әкімдіктер мен «Отбасы банктің» жалпы бюджеті 62,7 млрд теңгеге тең. Алматы, Астана қалаларынан бастау алған жастарды тұрғын үймен қамту бағдарламасы Алматы, Атырау, Қарағанды, Қостанай, Жамбыл, Батыс Қазақстан, Ақтөбе, Жетісу, Абай облыстарында жалғасын тапты.
Ел тыныштығын күзеткен 2 320 адам «Әскери баспана» бағдарламасы аясында үйлі болды.
Қарап отырсақ, биыл enpf-otbasy.kz платформасының көмегімен 487 мыңнан астам адам тұрғын үй сатып алу, ипотекалық несие төлеу мен емделуге біржолғы зейнетақы төлемдерін пайдаланыпты. Сондай-ақ қазақстандықтар болашақта қолжетімді шарттармен несие алу үшін зейнетақы жинақтарынан алуға болатын артық соманы «Отбасы банктегі» депозиттерге белсенді түрде аударып отыр. Бүгінгі таңда бұл опцияны 170 500 азамат пайдаланған.
«Отбасы банктің» 2022 жылғы ерекше табысының бірі – Moody’s Investors Service банктің ұлттық валютадағы депозиттері бойынша ұзақмерзімді рейтингін «Baa2» деңгейінде растағаны дер едік. Рейтинг болжамы «тұрақты». Сондай-ақ Fitch Ratings «Отбасы банктің» ұлттық валютадағы эмитентінің ұзақмерзімді дефолт рейтингі «BBB» деңгейінде екендігін дәйектеп берді. Бұл рейтинг болжамы да «тұрақты».
Қазір «Отбасы банк» жетекшілері мәлімдеп отырған ең басты жаңалық – жаңа жылдан бастап аталған банк Қазақстанда алғаш рет «Жасыл ипотека» бағдарламасын іске қоспақ. Бұл қазақстандықтар «Жасыл стандарттар» бойынша салынған, энергия үнемдейтін тұрғын үй кешендерінен пәтер сатып алуға несие ала алады деген сөз.
«Жасыл ипотека» бойынша алғашқы жарна – 20 пайыз. Оны төлеген банк клиенттері алдын ала заем ала алады. Мұндай несие бойынша мөлшерлеме 12,5%-ға (ЖТСМ 13,3% бастап) тең. «Жасыл ипотека» несиесінің ең жоғары сомасы – 35 млн теңге. Кредитті тек жаңа баспана сатып алуға пайдалануға болады. Тұрғын үйді OMIR, ГОСТ Р, BREEAM немесе LEED стандарттарына сәйкестік сертификаты бар нысандардан ғана сатып алуға болады.
АЛМАТЫ
