Коллажды жасаған Зәуреш Смағұл, «ЕQ»
Сертификат отбасы мүшесінің тек біреуіне ғана беріледі. Оны баспана сатып алуға, жаңадан үй құрылысын жүргізуге және қоныс тепкен жерден үйді ипотекаға рәсімдегенде алғашқы жарна ретінде пайдалануға болады.
Мемлекет ұсынып отырған жаңа тетік жайында өңірлік жұмыспен қамтуды үйлестіру және әлеуметтік бағдарламалар басқармасының басшысы Альмира Дисюпова түсіндіріп берді.
– Ертіс-Баян өңіріне соңғы жылдары еліміздің жұмыс күші мол шоғырланған өзге аймақтарынан және шетелден қандастарымыз жиі келе бастағанын көріп отырмыз. Биыл көші-қон бойынша берілетін жеңілдіктер, баспана жалдауға қарастырылатын төлемақы көлемдері сақталып отыр. Бұған қоса жаңадан экономикалық ұтқырлық сертификаты тетігі іске қосылды. Отанына оралып жатқан қандастарымыз бен көші-қон бағдарламасына ілесіп, өзге өңірлерден қоныс аударып жатқан ағайын үшін арнайы сертификаттар берілетін болды. Сертификат мөлшері
1 300 айлық есептік көрсеткішті құрайды. Ол қаржыны отбасылар елді мекендерден баспана алуға, «Отбасы банкі» арқылы екінші деңгейлі нарықтан пәтер сатып алу үшін алғашқы жарна ретінде пайдалануға, жаңадан тұрғын үй құрылысын бастауға бір реттік көмек ретінде қолдана алады. Сертификат есебінен баспана алуға берілетін жеңілдіктер мен субсидиялар 1 жыл бойы сақталатынын еске саламыз, – дейді басқарма басшысы. Өңірге көшіп келгендерді жұмыспен қамту мақсатында кәсіби біліктіліктерін арттыру, қайта оқыту курстары ашылып, жаңа ортаға сіңісіп кетулері үшін барлық мүмкіндік жасалмақ.
2022 жылы аймағымызда қандастарды қабылдауға 800 квота бөлінген еді. Ал биыл республика көлемінде қандастарды қабылдауға қарастырылған квота саны бойынша Павлодар көш басынан көрініп қалды. Қандастар үшін – 932, ал өзге өңірлерден қоныс аударушылар үшін 2 841 адамға квота бөлінген. Қоныс аударушылардың жолсапар құны өтеледі. Бұл үшін әр отбасы мүшесіне 241,5 мың теңгеден төленсе, алғашқы жылы пәтер жалдап тұрған шаңырақтарға ай сайын қосымша 51 мың теңгеден 103 мың теңгеге дейін қосымша көмек беріледі.
Павлодар облысы
