СЕНАТОРЛАР СУАРМАЛЫ ЕГІН ЖАЙЫН ТАЛҚЫЛАДЫ

Кеше Сенат Төрағасының орынбасары Мұхамбет Көпеевтің қатысуымен өткен “дөңгелек үстел” барысында еліміздегі суармалы егін шаруашылығы мен суармалы жерлерді тиімді пайдалануды жетілдіру мәселелері талқыланды. Шараға Аграрлық мәселелер және қоршаған ортаны қорғау комитетінің төрағасы Болат Жылқышиев жетекшілік етті. Шара барысында вице-спикер талқыланып отырған тақырып агроөнеркәсіп саласын дамытудың басым бағыттарын айқындаған Мемлекет басшысының Жолдауы тұрғысында өте маңызды болып отырғанын айтты. Еліміздің 2020 жылға дейінгі Стратегиялық даму жоспары мен үдемелі индустрия­лық-инновациялық дамыту жө­нін­дегі 2010-2014 жылдарға арналған мемлекеттік бағдар­ламаны жүзеге асыру жолдарына тоқталып өткен М.Көпеев, саладағы қатынастарды реттеуші заңнамалық базаны одан әрі жетілдіру қажеттігін атап өтті. Ауыл шаруашылығы вице-ми­нистрі М.Оразаев талқылауға қаты­сушыларды суармалы егін шаруа­шы­лығындағы мемлекеттік басқару жүйесін жетілдіруге бағытталған іс-шаралар барысы туралы хабардар етті. М.Оразаев суармалы жерлер көлемі­нің азаюына себептердің қатарында суармалы жерлерді қалпына келтіру бағдарлама­ла­ры­ның жеткіліксіз қаржылан­ды­ры­луын (соңғы 6 жылда осы мақ­саттағы іс-шараларға қажет қаржы ресурстары тек 18 пайызға ғана қанағаттандырылып келді), тауар өндірушілер мен су пайда­ла­ну­шы­лардың, шаруашылықтардың қаржы­лық және материалдық-техникалық мардымсыз қамты­луын атады. “Дөңгелек үстел” барысында баяндама жасаған салалық комитет хатшысы Қуаныш Айтаханов қатысушылар назарын суармалы жерлерді тиімді пайдалану жолын­дағы шараларды заңнамалық тұр­ғы­дан қамтамасыз ету аспекті­ле­рі­не аударды. Комитет төрағасы, сон­дай-ақ кейбір проблемалы жәйт­тер туралы сыни көзқарас­тарын білдіріп, оларды шешу жол­да­ры хақындағы ойларымен бөлісті. Талқылаулардың қорытын­дылары бойынша тиісті ұсыным­дар әзірленді. Асқар ТҰРАПБАЙҰЛЫ.