Заң жобалары мақұлданып, Сенат түзетулеріне келісім берілді

Кеше Парламент Мәжілісінің Төрағасы Қабиболла Жақыповтың төрағалығымен өткен жалпы отырыста депутаттар «Қазақстан Республикасының кейбір заңнамалық актілеріне Қазақстан Республикасының пошта байланысы саласындағы заңнамасының нормаларын Дүниежүзілік пош­та одағы актілерінің нормаларымен біріздендіру және пошта операторларының қызметін реттеу мәселелері бойынша өзгерiстер мен толықтырулар енгiзу туралы» заң жобасын мақұлдады. Парламент депутаттары Ш.Өте­місов, З.Балиева, Х.Валиев, Г.Исім­баева, С.Оспанов, М.Пішембаев, А.Самақова, Г.Сейітмағамбетова, Е.Тарасенко бастамашы болған заң жобасына қатысты Аграрлық мәселелер комитетінің мүшесі Ұласбек Сәдібеков қосымша баян­дама жасады. Депутаттардың айтуынша, бұл заң жобасы Елбасының «Қазақ­стан жолы – 2050: бір мақсат, бір мүдде, бір болашақ» атты Жол­дауында елдің транзиттік әлеуетін, логистикалық қызметтер көрсетуді және халықаралық сауданы дамыту бойынша атап көрсеткен стратегиялық міндеттерге қол жеткізу және орындау, сондай-ақ, Қазақстан Республикасының пош­та байланысы саласындағы заң­намасын халықаралық заңнамаға, атап айтқанда, Дүниежүзілік пош­та одағының актілеріне сәйкес келтіру негізінде әзірленген. Отырыс барысында тағай­ындалған операторды айқындауға қатысты мәселені Қазақстанның шешпеуіне байланысты Дүние­жүзілік пошта одағы атынан EMS кооперативі 2014 жылғы 1 шілдеден бастап барлық мүшелік жеңілдіктерді Қазақстанға беруді тоқтататыны туралы Ұлттық пошта операторын хабардар еткені айтылды. Сондай-ақ, депутаттар қазіргі таңда қабылданған халықаралық міндеттемелерді орындаудың қажеттілігі туып тұрғанын, осыған байланысты заң жобасының мінде­ті пошта байланысы көрсететін қызметтер нарығындағы қаты­нас­тарды ұйымдастырудың жаңа моделін енгізу болып табылатынын жеткізді. Ал бұл жаңа модель бірнеше жаңалықтарға негізделеді. Олар: тағайындалған оператор институтын және «пош­та байланысының әмбебап көрсетілетін қызметтері» ұғымын енгізу, тағайындалған операторға пошта байланысының әмбебап қызметтерін көрсету жөніндегі міндеттемелерді бекітіп беру. Бұған қоса, осы заң жобасына сәйкес 4 заңнамалық актіге, оның ішінде, «Почта туралы», «Табиғи монополиялар және реттелетін нарықтар туралы», «Байланыс туралы» және «Автомобиль көлі­гі туралы» Қазақстан Респуб­ликасының заңдарына өзгерістер мен толықтырулар енгізіліпті. Отырыста, сонымен қатар, «Қа­зақстан Республикасының Үкі­меті мен Эстония Респуб­лика­сының Үкіметі арасындағы Инвестицияларды көтермелеу және өзара қорғау туралы келісімді ратификациялау туралы» заң жобасы да мақұлданды. Сөз ал­ған палатаның Халықаралық істер, қорғаныс және қауіпсіздік ко­митетінің мүшесі Тұрарбек Аса­нов бұл келісім елдердің инвес­тициялық ахуалын жақсар­туға және мемлекеттер арасын­дағы өзара тиімді сауда-эконо­ми­калық ынтымақтастықты одан әрі дамытуға ықпал ететінін мә­лім­деді. Яғни бұдан кейін әрбір тарап өзінің ұлттық заңнамасына сәйкес, өз аумағында инвести­ция­ларды жүзеге асыру үшін екін­ші тараптың инвесторла­рын көтермелеп, оларға қо­лай­лы жағдайлар жасайтын болады. Сондай-ақ, әрбір тарап өз аумағында екінші тарап ин­вес­торларының инвестициялары мен кірістерінің толық қорғалуын және қауіпсіздікті қамтамасыз етуге тиіс. Палата отырысында депу­тат­тар «Қазақстан Рес­публи­касы­ның Үкіметі мен Ресей Феде­ра­циясының Үкіметі арасындағы Қазақстан Республикасының аумағы арқылы Қытай Халық Рес­публикасына ресейлік мұнайды тасымалдау саласындағы ын­ты­мақтастық туралы келісімді ратификациялау туралы» заң жобасын да мақұлдады. Бұл заң жобасы турасында сөз алған Мәжілістің Халықаралық істер, қорғаныс және қауіпсіздік комитетінің хатшысы Виктор Рогалев келісімнің мақ­саты ресейлік мұнайды Қазақ­стан Республикасының аума­ғы ар­қылы Қытай Халық Рес­пуб­ли­касына тасымалдау үшін жағдай жасау болып табылатынын атап өтті. Депутаттар «Қазақстан Рес­пуб­ликасының Үкіметі мен Ита­­­лия Республикасының Үкі­меті арасындағы Ауғанстан Ис­лам Республикасын тұрақ­тан­дыру мен қалпына келтіру жөнін­дегі іс-қимылдарға Ита­лия Республикасы Қарулы Күш­терінің қатысуына байланысты Қазақстан Республикасының ау­мағы арқылы әскери мүлік пен персоналдың транзитін қамтамасыз ету туралы келісімді ратификациялау туралы» заң жобасында мақұлдады. Мәжілістің Халықаралық істер, қорғаныс және қауіпсіздік комитетінің мүшесі Бақытжан Ертаев бұл келісім Ауғанстан Ислам Рес­пуб­ликасын тұрақтандыру мен қал­пына келтіру жөніндегі халық­аралық іс-қимылдарды қол­дау мақсатында Қазақстан Рес­пуб­ликасының аумағы арқылы Италия Республикасының әске­ри мүлкі мен персоналының транзитін жүзеге асыру тәртібін айқындайтынын хабарлады. Жалпы отырыс аясында «Кас­пий теңізіндегі қауіпсіздік сала­сындағы ынтымақтастық тура­лы келісімді ратификация­лау туралы», «Қазақстан Рес­пуб­ликасының Үкіметі мен Өзбекстан Республикасы Үкіметінің арасындағы шекара өкілдерінің қызметі туралы келісімді ратификациялау туралы», «Қазақстан Республикасының азаматтарына, оралмандарға және Қазақстан Республикасында тұруға ықтияр­хаты бар тұлғаларға олардың мүлікті жария етуіне байланысты рақымшылық жасау туралы» заң жобаларында қарап, қабылдады. Мәселен, «Қазақстан Рес­пуб­ликасының Үкіметі мен Өзбекстан Республикасы Үкіметінің ара­сын­дағы шекара өкілдерінің қыз­меті туралы келісімді ратификациялау туралы» заң жобасына қатысты Мәжілістің Халықаралық істер, қорғаныс және қауіпсіздік комитетінің мүшесі Оразкүл Асанғазы шекара өкілдерінің бірлескен жұ­мысы жоспарлы және жоспардан тыс болуы мүмкін отырыстар­да немесе кездесулерде жүргізілетінін, келісімге сәйкес, тараптар шекара өкілдері мен шекара өкілдерінің орынбасарларын тағайындайтынын жеткізді. Бұл күнгі отырыста Пар­ла­мент Мәжілісі сондай-ақ, Қа­зақ­стан Республикасы Қылмыс­тық кодексінің жобасы мен қыл­мыстық заңнаманы жетілдіру мәселелері бойынша өзгерістерге Сенат енгізген түзетулерге ке­лі­сімін берді. Ләйла ЕДІЛҚЫЗЫ, «Егемен Қазақстан».