Бас прокуратураның мәлімдеуінше, бүгінде еліміз – құрамына Солтүстік және Оңтүстік Американың 27 елі кіретін 3 америка-аралық конвенцияның толық қатысушысы. Ал бұл конвенциялар ұстап беру, қылмыстық істер бойынша құқықтық көмек және шетелде қылмыстық жазасын өтеуге қатысты.
Жалпы, Қазақстан соңғы уақытта қылмысқа қарсы іс-қимыл мәселелері бойынша шет мемлекеттермен халықаралық ынтымақтастықты дамыту бағытындағы жұмысты жандандырып келеді. Қазіргі уақытта Мемлекет басшысының жарлықтарымен Перу Республикасымен барлық шарттар, Малайзиямен ұстап беру, Мысырмен қылмыстық істер бойынша құқықтық көмек және ұстап беру туралы шарттар мақұлданған. Құжаттар қол қоюға дайын.
Парламентте Франциямен қылмыстық істер бойынша құқықтық көмек және Өзбекстанмен сотталған адамдарды беру туралы шарттарды ратификациялау туралы заң жобалары қаралып жатыр. Сондай-ақ Мысыр және израильдік әріптестермен сотталғандарды беру, Аргентинамен қылмыстық істер бойынша құқықтық көмек көрсету және ұстап беру, Португалия, Словакия, Латвия және Иранмен қылмыстық істер бойынша құқықтық көмек көрсету туралы, ал Мароккомен барлық үш келісімге қол қою жөнінде келіссөздер жүргізіліп жатыр.
«Қол жеткізілген құқықтық база және шетелдік әріптестермен орнатылған байланыстар қылмыстық-құқықтық салада тығыз ынтымақтасуға және қылмыскерлерді жазалаудың бұлтартпастығын қамтамасыз етуге мүмкіндік береді», дейді Бас прокуратура өкілдері.
Ведомство ұсынған мәліметтерге ден қойсақ, өткен жылы шет мемлекеттер Қазақстанның іздеуде жүрген адамдарды ұстап беру туралы 50 сұрау салуын қанағаттандырған.Мысалы, өткен жылы Бахрейн Корольдігі кәмелетке толмаған қыздарды Қазақстаннан Бахрейнге жыныстық пайдалануға жібергені үшін күдікті А.Пичугинді ұстап берген еді.
«РБК Банкі» АҚ-ның 15 млн доллардан астам сомасын ұрлады деген күдікті В.Власов, «Qi TRADE Kazakhstan», «Выгодные займы» қаржы пирамидаларын құрып, басшылық еткені үшін іздеуде жүрген С.Абсаметова, Б.Томин, Е.Шарифуллин, сондай-ақ құрамында 1 млрд теңгеден астам сомаға алтыны бар материалды қылмыстық топтың құрамында ұрлағаны үшін А.Тимакованы Ресей тарапы ұстап берген болатын. Ал Қырғызстан трансұлттық ұйымдасқан топтың құрамында аса ірі мөлшерде алтын мен зергерлік бұйымдардың экономикалық контрабандасы үшін іздеуде жүрген Тастан Эбубекирді ұстап беру туралы сұранысты қанағаттандырды.
Қару қолдану арқылы адам өлтіргені үшін іздеуде жүрген О.Иссалы мен Б.Исабеков Тәжікстаннан экстрадицияланған. Алаяқтық жолымен 288 млн теңгені жымқырып кеткеннен кейін еліміздің құқық қорғау органдары іздеп жүрген А.Смалбаеваны Өзбекстан тарапы ұстап берген еді.
Мемлекет басшысының тапсырмасы негізінде шетелден заңсыз шығарылған активтерді қайтару бойынша да кешенді жұмыс жүргізіліп келеді. Экономикалық ресурстардың заңсыз шоғырлануына қарсы іс-қимыл мәселелері жөніндегі ведомствоаралық комиссияға Бас прокурор басшылық етеді. Сонымен қатар қазіргі таңда Үкімет және басқа да мүдделі мемлекеттік органдар бірлесіп заңсыз шығарылған активтерді қайтару жөніндегі қосымша шаралар кешенін қамтитын заң жобасын әзірлеп жатыр.
