«Өткен жылы біз бұл көрсеткіш бойынша рекордтық өсімге қол жеткіздік. Биылғы жылы міндет бұдан да ауқымды, яғни кірісті 3,7 триллион теңгеге арттыру көзделіп отыр. Көлеңкелі экономиканы қысқарту, салықтық және кедендік әкімшілендіруді жақсарту бойынша жұмысты күшейтеміз», деді Ерұлан Жамаубаев.
Қаржы министрлігінің басшысы «Бір терезе», «Астана1», «Электрондық шот-фактуралар» сияқты ақпараттық жүйелерді қамтитын тауарларды қадағалаудың ұлттық жүйесі жаңғыртылып жатқанын қоса айтты.
«Халыққа және бизнеске ыңғайлы болу үшін біз e-Salyq Azamat және e-Salyq Business мобильді қосымшаларының қамтуын кеңейтеміз. Қаржы институттарына электронды қызмет көрсету арқылы біз қолма-қол ақшасыз төлемдердің қарқынды өсуін қамтамасыз етеміз. Кедендік статистикалық мәліметтер арасындағы алшақтықты азайту бойынша белсенді жұмыстар жүргізіліп жатыр. Осы мақсатта негізгі сауда серіктестерімен ақпарат алмасу жолға қойылды», деді Ерұлан Жұмаубаев.
