Суретші кейде табиғат пен адам арасындағы елші секілді. Жүрек лүпілі қылқаламның әрбір сүйкелісінен көрініп тұрса ғана суретшінің өмірі мен шығармашылығының біртұтас әлемге айналғаны. Сұлулықты осылай ғана түсінуге болады. Жанымен жазатын шебер таңсық жемістер, әдемі гүл шоқтары, гүл тізбектері, күлтеленген маталар, формасы әшекейлі себеттер, тауыс қауырсындары мен әсем ыдыстарды бейнелегенде жансыз затқа жан бітіргендей әсерге қалдырады. Кенептегі омбы қарға шомылған биік қарағайлар, кішкентай терезелері жарқыраған аласа үйлер, күн шапағына бөленген ауыл кеші, Іле Алатауы жоталарының маңғаз көрінісі жүрекке жылы тиеді. Оның қолтаңбасына тән басты ерекшелік – жарқын да қанық палитра, өмірге құштарлық һәм позитив. Ми кемірген мыңсан сауалдың жауабын ағаштардан, гүлдерден, жемістерден, аспандағы бұлттардың ғажап құбылысынан іздейтін суретші мұңның өзін сұлулық арқылы береді.
Кейіпкеріміз өнерге алғаш қадам басқанда импрессионист суретшілерге айрықша қызығушылық танытқан. Өзінің сүйікті суретшілері сияқты, ол да үнемі эксперимент жасайды, біресе таза бояуларды түтіктен тікелей кенепке сығып, бояп, туындысын импрессионистерше ұсақ бояулармен аяқтайды, кейде, қарама-қарсы түрлі-түсті көлеңкелер жасау үшін қара түсті немесе қою көк кобальтты пайдаланады. Туындыгер француз және орыс пост-импрессионист және авангард суретшілерінің полемикалық жұмыстарына да назар аударады. Оның туындысында өзіне тән қарама-қарсы түстер, жеңіл геометриялық пішіндер, объектілерге бірнеше көзқарастың үйлесімі көрінеді.
Өнертанушы Мария Копелиович, «Салтанат үшін жалпыадамзаттық мәселелерге, міндеттерге және оларды шешу мүмкіндіктеріне көңіл бөлу өзекті», дей келе Сәдібекованың қолтаңбасы хақында өз ойын ортаға салды.
– Бүгінгі таңда Сәдібекова біздің мәдени өмірімізге берік енген «сәндік кескіндеме» стилінде жұмыс істейді. Декоративтілік көркем шығарманың көркемдік дизайнын толықтыра отырып, талғампаздығымен, сәндік формасымен, бөлшектерді мұқият өңдеуімен ерекшеленеді. Суретші түсті туындының өзін-өзі басқаратын объектісі ретінде түсіндіреді. Сонымен қатар ол түс пен сызық, пәндік пішін және үш өлшемді кеңістік арасындағы көрнекі диалогке де қызығушылық танытады. Мысалы, күздің суреттерін салу үшін Салтанат күзгі ашық табиғи түстерді пайдаланады, бірақ екінші және үшінші жоспардағы үнсіз тондардың, ақ дақтардың қарама-қайшылықтарының және бірінші жоспардағы қараңғы сызықтық үлгісінің арқасында оларды күйдіріп, жарқыратады. Қазіргі заманғы өнерде форма мен стиль шексіз түрде еркін қолданылады. Бұл фактіні бастапқы нүкте ретінде қабылдай отырып, Салтанат өзінің шынайы үні мен әлемге деген көзқарасын көрсетуге тырысады. Оның пікірінше, шығармашылық ізденіс, өзін-өзі көрсетуге деген ұмтылыс суретшіден өте адал болуды, етене жақын, терең тәжірибенің басын ашуды талап етеді, сондықтан ол әрқашан өз картиналары үшін жаңа бағыттар мен бейнелерді іздейді, – дейді Мария Копелиович.
Жуырда суретшінің Ә. Қастеев музейінде сән түзеген «Бояулар мерекесі» атты көрмесіне барудың сәті түсті. Оның «Шарын шатқалы» туындысы еріксіз назар аудартады. Басты нысаннан бөлек кенептегі жаздың аптап ыстығы, аспанның қанық көк түсі шөлейттер аңғарының сұлулығын арайландыра түскендей. Биіктігі 300 метр және 12 миллион жыл болған шөгінді жыныстардан тұратын көлемді монументалды табиғи ескерткіштер бірінен соң бірі бейнеленген шығарманың өзегіне үңілген көрерменге Шарынмен байланысты кез келген гипербола, метафора, эпитеттің сыры ашылады. Сәдібекова кенептерге алдын ала эскиздер жасамайтынын, бірақ бос кенепке «көлеңкесіз сызықтармен» сурет салатынын, содан кейін жұмыс «жоғарыдан аян түрінде келетін колористикалық шешіммен» аяқталатынын айтады.
Кейде суретші әлем халықтары ертегілерінің сюжеттеріне назар аудару арқылы, ежелгі әлемнің мәдениетіне көңіл бөледі. Бұл оған кітаптарға емес, интерьерді безендіруге арналған «миниатюралар» жасауда бұрынғы шеберлердің тәжірибесін пайдалануға мүмкіндік береді.
АЛМАТЫ
