Кеңейген стартап бағдарламалары

Еске салсақ, былтыр Цифрлық даму, инновациялар және аэро­ға­рыш өнеркәсібі министр­лі­гінің қолдауымен Astana Hub Орталық Азиядағы Google for Startups бағдарламасының алғаш­қы серіктесі болды. Silkway Accelerator бірлескен бағдар­ла­ма­сының бірінші легі былтырғы шіл­деде, екінші легі қыркүйек айын­да басталған болатын.

– Google for Startups-пен ынты­мақтастықтың арқасында Орта­лық Азиядан, Әзербайжан және Моңғолиядан 25 үздік стартап жаһандық нарыққа шығып, акселератор кезінде қарқынды дамыды. Барлық компанияның ай сайынғы табысы орта есеппен екі есеге артты. Google for Startups-пен серіктестігіміз қи­сын­ды жалғасын тапты. Қазір бағ­дарламаға өтінімдер қабылдап жатырмыз. Биылғы жаңалық -– Google for Startups бағдарламасы Грузияны қосу арқылы бағдар­ла­ма­ның қамту аймағын кеңейтті. Енді осы елдің стартаптары да біздің акселераторға қатыса алады, – деді Astana Hub бас директоры Мағжан Мәдиев.

Өткен жылы бағдарламаға 567 технологиялық жоба бо­йынша өтінім түскен. Олардың 30-ы іріктеуден сәтті өтіп, ал 25-і бағдарлама барысында та­быс­­тарын арттырып, жаңа на­рық­тарға шықты. Мысалы, Citix ақпараттық-навигациялық жү­йе­сі Түркия мен Біріккен Араб Әмірліктерінің нарығына бағыт алды. Zypl.ai стартапының негізін қалаушылар екі жаңа нарықта сатылымдарын кеңейтіп, құнын 6 млн доллардан 10 млн долларға ұлғайтты. CTOgram жобасы 230 мың белсенді автокөлік иелері мен 2 мыңнан астам жөндеу шеберханасын қамтыды. Fibo.cloud компаниясы ай сайынғы кірісін 22 есеге, Metatesk білім беру плат­фор­масы 4 мың доллардан 18 мың долларға өсірді, ал Planet9 необанкінің сатылымы 0-ден 70 мың долларға артты. Zan.bar еуропалық нарыққа шығып, өз өнімін Ұлыбританиядағы 12 банкпен интеграциялады.

Silkway Accelerator-дың үшін­ші легі 2023 жылдың 20 нау­ры­зында басталады. Бұл жолы да оқу Астанада оффлайн формат­та тегін өтеді және үш айға созы­лады. Қазақстан, Қыр­ғыз­стан, Өзбекстан, Әзербайжан, Моңғолия, Тәжікстан, Түркі­мен­стан және Грузия елдерінің Product/Market Fit, Scale кезе­ңін­де­гі IT-стартаптарынан өтінімдер 17 ақпанға дейін қабылданады. Қатысушылар Google-дың үздік сарапшылары, Astana Hub-тың тәжірибелі трекерлері мен менторларынан тәлім алып, шеберлік сабақтарына, сондай-ақ PR қол­дауға ие болады. Үшінші лек­тің нәтижесіне орай Demo Day ұйымдастырылып, стартаптар жергілікті және шетелдік инвес­тор­ларға өз жобаларын таныс­тырады. Сонымен қатар Astana Hub қатысушыларға жаб­дық­тал­ған бас­пана мен жұмыс орнын ұсынады. Олар бизнес-про­цес­терді дұрыс жүр­гізіп, тиім­ді серіктестік құру­ды, жоба ауқы­мын кеңейтіп, инвестиция тартуды үйренеді.

– Бастапқыда бұл жай ғана стар­таптарға арналған кезекті қа­ра­пайым бағдарлама деп ой­ладым. Бірақ қазір оны ең жақ­сы бағдарлама деп санаймын. Біз белсендірек, бірақ сонымен бірге барынша ойласып әрекет ете бастадық. Дамуды жеделдететін жаңа бизнес қадамдар іздестірдік. Атап айтқанда, Америка, Канада және Аустралия нарықтарында белсенділігіміз артты, – деп  әсері­мен бөлісті Smoothly LTD бас директоры Ержан Асанов.

Оның ұйқыны жайлы ететін Smoothly мобильді қосымшасы «Денсаулық және фитнес» санаты бойынша Канада мен Аустра­лия­дағы App Store-дың 100 үздік қолданбасының тізіміне еніп, 30 мың­нан аса жүктелген.

Google for Startups – 2011 жылы Google корпорациясы іске қос­қан стартап бағдарламасы. Ол 125 елдегі 50-ден астам коворкинг пен акселератордан тұ­рады және технологиялық кә­сіп­керлер үшін практикалық са­бақ­тар ұсынады.