Елімізде туризм саласына 6 млрд. долларға дейін инвестиция құйылуы мүмкін

АСТАНА. 16 маусым. Елімізде Туризм саласын дамытуға 2020 жылға қарай 6 млрд. долларға дейін жеке инвестициялар тартуға мүмкіндік бар. Үкімет басшысының орынбасары,  Индустрия және жаңа технологиялар министрі Әсет Исекешев осылай деді. Бұл туралы primeminister.kz. Парламент Мәжілісіндегі Үкімет сағатында Әсет Исекешев: «Әрине, біз туризм саласын дамытудың жағымды нұсқасына ұмтыламыз. Осы сценарий бойынша саланың жалпы ішкі өніміндегі үлесі 3 пайызға, жеке инвестициялар 6 млрд. долларға жетуі және 300 мыңға дейін жаңа жұмыс орны құрылуы мүмкін», – деді Ә. Исекешев. Сондай-ақ, Үкімет басшысының орынбасары,  Индустрия және жаңа технологиялар министрі туризм саласын 2020 жылға дейін дамытудың үш сценариі жасалып жатқанын айтты. Бұдан бөлек, ол туризмді дамытуға байланысты бірқатар заңнамалық өзгерістер жоспарланғанын мәлімдеді. Әсет Исекешев: «Таяу арада заңнамалық актілерге өзгерістермен Парламентке келеміз. Мұндағы мақсат – шетелдік туристер визалық тәртіпті жеңілдету, ішкі, әлеуметтік туризмді дамыту», – деді. Оның айтуынша, жағымды сценарий бойынша 2020 жылға қарай елімізге жыл сайын келетін туристер санын 8-9 млн. көрсеткішке жеткізу күтілуде. Жолдыбай Базар. Дереккөз: primeminister.kz. Фото: Dmk.