Аймақтар • 29 Қаңтар, 2023

Балғын қаламгерлер бағалы сыйлық алды

184 рет
көрсетілді
2 мин
оқу үшін

Батыс Қазақстан облыстық «Орал өңірі» газетінің редакциясы балалар шығармашылығы байқауын сонау 2002 жылдан бері ұйымдастырып келеді екен. Тек соңғы бірер жылда пандемия кесірінен байқау жеңімпаздарын ұлықтау кейінге қалған. Сол салтанаттың сәті түсіп, жақында «Айналайын» бетінде шығармалары жарияланған тоғыз автор редакцияға шақырылды.

Балғын қаламгерлер бағалы сыйлық алды

Олардың арасында:

«Қоян келіп шай қойды,

Аю баппен қой сойды.

Әзірлеген тамағын,

Торғай тартып

жеп қойды»,

деген өтірік өлең жолдап, күл­кіге қарқ қылған Айназ Жанес те бар.

Балғын қаламгерлерді редакцияда ақын, Қазақстанның еңбек сіңірген қайраткері, Мемлекеттік сыйлықтың лау­­реаты, «Отан», «Құрмет» орден­дерінің иегері Ақұштап Бақ­ты­гереева бастаған аға-апа­лары қарсы алып, олардың шығар­машылық сапарына ақ жол тіледі. «Біз де көкөрім ке­зімізде газетке хат жолдайтынбыз. Со­сын «Қашан шығады екен?» деп тағатсыздана күтіп жүре­тінбіз. Қалам ұстау – кез келгенге берілмейтін қасиет. Су­рет салу, өлең жазу өнерге, өмір­ге құштарлықтан басталады. Мен «Орал өңірінің» балауса тілшілерінің жылдан-жылға қатары көбейіп келе жатқанына қуаныштымын. Бүгін сендерге ана, әже ретін­де ақ батамды беруге келдім. «Жолдарың ақ болсын, ғұмыр­ларың ұзақ болсын! Жыр­лай­­тын тақырыптарың туған жер болсын, туған елдің аспанын бұлт торламасын! Ақ­жайықтың атырабы сендерді ар­манның асқарына аттандырар тұғыр болсын!», деді ақын.

Сонымен Теректі ауданы Шағатай ауылында тұратын Кәусар Наурызғали – «Туған ел», Теректі ауданы Жаңаөмір ауылында тұратын Сабина Жыл­қышы – «Бақытты бала­лық шақ», осы ауылдың та­ғы бір өрені Айназ Жанес  «Ұш­қыр қиял» аталымдары бо­йынша марапатталды. Те­ректі ауданы Ақсоғым ауы­лын­да тұ­ратын Нұрқанат Сы­рым «Аза­мат» аталымының жүл­десін иеленді. Бәйтерек ауда­ны Өркен ауылынан Асыл Сә­лім­жанқызы мен Іңкәр Ғазиз «Мейірім» және «Балғын бояу» аталымдары бойынша марапатталды. Жаңақалалық Әзиз Аңсабеков «Ұлы мәртебелі Тә­уелсіздік» аталымын ен­ші­леді. Орал қаласындағы №45 мектеп оқушылары Арсен Махамбет «Табиғат жанашыры», ал Әмір Сапарәлиев «Та­ным терезесі» аталымы бойынша үздік деп танылды.

«Айналайын» балалар шы­ғармашылығы байқауының жеңімпаздарына ардагер ұстаз М.Берген және Қ.Есендияров, Ғ.Жанбозов, Е.Есенғалиев, С.Тоқмәмбетов сынды азаматтар демеуші болған.

 

Батыс Қазақстан облысы