Тағылымды сапар

Дін істері агенттігінің төрағасы Марат Әзілханов жақында арнайы сапармен Жамбыл облысының Қордай ауданында болды, деп хабарлады агенттіктің баспасөз қызметі. Агенттік төрағасы сапары барысында Қордай ауданының Масаншы, Сортөбе, Ауқатты ауылдық округ­терінде болып, мешіттерді аралады, мешіт имамдары және жамағаттарымен жүздесіп, ондағы халықтың діни сауаттылығын арттыру және теріс діни ағымдардың әрекеттеріне қарсы атқарып жатқан жұмыстарының жай-күйімен танысты. Агенттік төрағасының сапары Сор­төбе ауылдық округіне қарасты Бұлар батыр ауылында аудан әкімі Қ.Досаевтың, облыс әкімдігі дін істері басқармасының басшысы С.Ай­дапкеловтің, білім саласының қызметкерлері мен учаскелік полиция қызметкерлерінің, ауылдық ардагерлер кеңесінің төрағалары мен облыс және аудан имамдары, ауыл тұрғындарының қатысуымен өткен кездесуге ұласты. Сапардың екінші күні Қордай ау­даны әкімдігінде облыс әкімі К.Көкірекбаевтың төрағалығымен облыс әкімдігі жанындағы діни бірлестіктермен байланыстар жөніндегі кеңестің көшпелі кеңейтілген отырысы өтті. Оған жергілікті атқарушы және құқық қорғау органдары, Қазақстан халқы Ассамблеясы Хатшылығының қызметкерлері, кеңестің қоғамдық және діни бірлестіктер өкілдерінен тұратын мүшелері, Тараз қаласы мен аудан әкімдері, прокуратура, Ұлттық қауіпсіздік комитеті департаменті өкілдері қатысты. Кеңес отырысында Қордай ауданының Сортөбе, Байзақ ауданы­ның Қызыл Жұлдыз, Жуалы ауда­нының Ақсай ауылдық округтері әкімдік­терінің тұрғындар арасында діни сауаттылықты арттыру және радикалды діни ағымдардың ықпалына түсудің жолын кесу бойынша атқарған жұмыстары қаралып, ауыл әкімдері баяндама жасады. Одан кейін С.Айдапкелов облыстағы діни ахуал мен атқарылып жатқан жұмыстар туралы ақпарат берді. Ал М.Әзілханов аудандағы діни ахуал мен атқарылып жатқан жұмыстарға қатысты пікірін айтып, осы бағыттағы іс-қимылды одан әрі жетілдіру үшін бірқатар нақты ұсыныстарын берді. Отырысты К.Көкірекбаев қоры­­тын­дылап, тұрғындардың діни сауат­тылығын арттыру мақса­тын­да ауылдық округтерде құрыл­ған ақпараттық-насихаттық топ жұ­мыстарын жандандыруды, жас­­тар арасында радикалды діни ағым­дар­дың ықпалына түсудің жолын кесу мақсатында дәстүрлі ислам құндылықтарын және ұлттық салт-дәстүрлерді насихаттау жұмыстарын одан әрі жалғастыруды, жастардың бос уақыттарын тиімді ұйымдастыру үшін мемлекеттік әлеуметтік саладағы кешендерді тиімді пайдалана отырып, олардың бойында патриоттық сезімді қалыптастыруға ықпал етуді кеңес мүшелері мен облыс әкімдігінің мүдделі басқарма басшылары және Тараз қаласы мен аудан әкімдеріне тапсырды.