Бұл жолы да Әбиба Әбужақынова өз жанкүйерлерін қуантты. Аса жеңіл салмақта өнер көрсеткен қазақ қызы алғашқы айналымда бос болды. Одан кейін франциялық Мелани Вьены ұтқанымен, ширек финалда испаниялық Лапуерта Комасқа есе жіберді. Жұбаныш белдесуде жапониялық Рина Татсукаваны тізе бүктірген Әбужақынова шешуші тұста Оңтүстік Кореяның өкілі Ли-Хе-Кенгті қапы қалдырып, қола медальді мойнына ілді. Осылайша, Әбиба биылғы жылдың өзінде екі бірдей аса ірі халықаралық турнирден олжалы оралды. Күні кеше ғана ол Португалиядағы Гран-при сайысында алтыннан алқа таққан болатын. Ал былтыр Азия және әлем чемпионаттарында жүлдегерлер қатарына қосылды.
Көп кешікпей 73 кило салмақтағы Данияр Шамшаевтың дәл сол межеден көрінгені жайында қуанышты хабар жетті. Қола медаль үшін тартыста ол канадалық Артур Маргелидоннан басым түсті.
