Экономика • 08 Ақпан, 2023

Қуаты мол құрама жем

371 рет
көрсетілді
3 мин
оқу үшін

2010 жылдың шамасында Панфилов ауданында «Қорғас-шығыс қақапасы» арнайы экономикалық аймағы құрылды. Ондағы мақсат – мемлекеттік индустриялық-инновациялық даму бағдарламасын өрістету еді. Бұл – отандық және шетелдік инвесторлардың өндіріске қаржы жұмсаудағы белсенділігін арттыратын ірі жоба. Қазір өз нәтижесін беріп жатыр.

Қуаты мол құрама жем

Өңірдегі «Құрғақ порт» халық­аралық жүк тасымалында өзінің экономикалық тиім­­ді­лігін танытып үлгір­ді. Логис­тикалық орталық­та дайын­дық шаралары атқа­рылып жатыр. Индустриялық ор­та­лықта қазір он шақты өн­ді­ріс кө­зінің құрылысы салынып, өнім өндіруге кірісуде. Солар­дың бірі – өткен жылдан бері құрама жем шығара бас­та­ған «SSA Feed Mills» ЖШС. Оның қазіргі жылдық өнім өн­діру қуаты 60 мың тонна құра­ма жем шығарып, шетелге және жергілікті халыққа сату. Бүгінге дейін бұл зауыттан 1 мың тоннадан аса түйіршектелген құрама жем сатылған. Жем тартушы, түйіршектеуші және қаптаушы цехтарының еңбеккерлері мен технологтер ай сайын 250-270 тонна мал мен құс азығының 20-дан аса түрін дайындайды.

Мұнда құрама жемге жү­гері, бидай, майбұршақ, арпа, сұлы дәндері, басқа да мал ағ­засына пайдалы дәрумен­ді зат­тар қолданылады. Мал азы­ғында­ғы протеин, кальций, фос­фор, коротеин мөлшерінің талап­қа сай болуын озық үлгі­дегі жабдықтармен жарақтан­дырылған арнайы сарапхана қызметкерлері бақылайды.

«Жалпы 46 маман еңбек ететін кәсіпорында ірі қара, жылқы, қой, шошқа, балық, құсқа қажет толық рационды жем өнімдері өндіріледі», дейді зауыт директоры Сергей Нам.

Оның айтуынша, олардың әрқайсысы тапсырыс беруші­лердің жеке рецепті бойынша жасалады. Ит тамағын да­йын­дауға да ұсыныс түсіп жатыр. Зауытқа орнатылған автоматтық басқарудағы озық үлгідегі құрал жабдықтар­мен кез келген жа­нуар азығын дайындауға мүмкіндік мол. Зауыт толық қуатында жұмыс істесе, қызметшілер санын 100-ге дейін көбейтіп, үш ауысымда тәулігіне 10 тоннаға дейін өнім өндірмек.

Кәсіпорында қоспа жем шы­ғарудан өзге астық сақтай­тын сыйымдылығы 15 мың тонналық элеватор бар. Жалпы 7 адам еңбек ететін элеватор жергілікті кәсіпкерлердің бидай, жүгері дәнін сақтап, өңдеп, дайын астықты елдің және Тәжікстанның кәсіп­орын­дарына жөнелтіп, коммер­ция­лық қызмет көрсетеді. Зауытқа теміржол желісі тартылған.

АЭА аумағында салынған бұл зауыт өнімдері негізінен қытайға қоспа жем сатуға бағыт­талған. Әлемді жайлаған індетке байланысты құрама жем ел аймақтарындағы кәсіп­орындар мен Тәжікстан фермерлері­мен жұмыс істеп жатыр. Құс пен балық жемі отандық құс өсірушілер мен балықшыларға жіберіледі. Тараз қаласы мен Қордай фермерлері ірі қара бордақылайтын құрама жемге тапсырыс беріп жатыр.

Жалпы, ауылдағы елдің негізгі кәсібінің бірі – мал бор­дақылап сату. Олардың көбі малын бидай, арпа, жүгері жемімен бағады. Дәруменмен байы­тылған құрама жем түлік­тің тез жетілуіне, ет сапасының артуына пайдалы.

 

Жетісу облысы 

Соңғы жаңалықтар