Елімізге Оңтүстік Корея президенті ресми сапармен келеді

АСТАНА. 18 маусым. Оңтүстік Корея президенті Пак Кын Хенің елімізге жасағалы отырған сапары екі ел арасындағы қарым-қатынасты одан әрі нығайта түспек. Бұл туралы egemen.kz тілшісі хабарлады. Оңтүстік Корея үшін Еуразияның кіндігінде орналасқан Қазақстанның маңызы зор. Еліміз бен Оңтүстік Корея арасындағы байланыс жақсы жолға қойылған. Сөзіміздің дәлелі ретінде аталған мемлекеттен біздің елімізге шамамен 8 млрд. доллар инвестиция тартылғанын айтуға болады. Қазіргі таңда екіжақтың алдында бірнеше ірі жобаларды жүзеге асыру міндеті тұр. Бұлардың арасында Балқаш жылу электр стансасын салу, Атырау облысындағы газ-химия кешені мен Жамбыл мұнай кен орнын игеру секілді жобалар бар. Бұдан бөлек, бүгінде елімізде оңтүстіккореялық капиталдың қатысуымен 700-ден астам бірлескен кәсіпорын жұмыс істеуде. Жолдыбай Базар. Дереккөз: egemen.kz. Фото: m.korea.net.