Атамыз – айтулы ғалым, аяулы әке, ардақты ата, асыл жар, айналасына нұрын шашқан айрықша қамқор адам. Досқа көмектесу – оның «Жедел жәрдем» қызметі сияқты «екінші мамандығы». Еш адамға қылдай арамдығы жоқ, түзу жаратылған жан. Достықтың алтын арқауын үзіп алмай, қастерлей қадірлеп келе жатқан азамат. Мінезінің дарқандығынан қызметінде де керемет сый-құрметке ие. Табиғатынан нәзік, жақсы мен жаманның нарқы мен парқын жақсы ажырататын парасат иесі.
«Ұлылық – қарапайымдылықта» деген өте дұрыс ұғым екен Текті әулеттің туын жасына қарамай көтеріп келе жатқан жан – барлық бауырының арасындағы туыстық қарым-қатынастың ұйытқысы. Мен өзімді оның бақытқа бөленген немерелерінің бірімін деп санаймын. Өміріме нәр берген Төребек атамнан кейінгі адам – осы Жақсыбай ата. Өмірге ой көзімен қараған шағымда білімі мен кісілігі, алғырлығы мен алымдылығы, пайымы мен парасаттылығы мол атама қарап өссем деймін.
Жақсыбай атамен әр кездесу – үлгі-өнеге, айтқан сөзі – тағылым. Қанына біткен ұлтжандылық қасиеті айқын көрініп, білімпаздығы ерекше дараланып тұрады.
Адам баласын жақсылыққа жеткізетін жақсы қасиеттері деп ойлаймын. Адамның өзін-өзі құрметтеуінің басты қағидасы ішкі және сыртқы мәдениетті тең ұстау – атама тән қасиет. Атамның жүзінен де, мінез-құлқынан да ерекше тектілік байқалады. Жүріс-тұрысы, киім киісі, аса талғампаздығы – біз үшін «бренд». Төребек атамның жоқтығын білдірмей, әжемнің 70 жасқа келген мерейтойын Алматыға өзін шақырып тойлап беруі екінің бірінің қолынан келмейтін мәрттік деп ойлаймын. Менің атам осындай. Өне бойы толы өнер. Домбыра ұстаса, әуелете ән салып, күмбірлете күй шертеді.
«Кілемге бергісіз алаша болады, ханға бергісіз қараша болады» деген сөз бар екен. Сол сөз менің Жақсыбай атама қарап айтылғандай. Кісіден тек жақсылық іздеп, жақсы адамдардан өнеге алған, жақсылармен араласа өмір сүрген адам түбінде нұрға бөленеді. Дүниенің мәні – үзбей жетілу, сәулелі сатыға көтерілу. Кісінің ала жібін аттамай өмір сүру, жоқ пен бардың ара салмағын безбендеп қанағатшыл болу, сыпайы салмақты, кісінің көңілін қалдырмай, дос-жаранмен кішіпейіл қарым-қатынаста тірлік кешу – атамның мағыналы ғұмыр жасындағы басты байламы. Немерелерін де осы қағидаға үйретіп, жақсылыққа баулып келеді.
Ардақты ата! Алып бәйтеректей құт-береке ұйытқысы болып, орныңыз құрметті төрден түспесін! Өзіңді түсінетін, үлкен тұлға болуыңды өмір бойы қолдап келе жатқан жан жарың аман жүрсін! Мерейлі жасыңмен шын жүректен құттықтаймын!
Ұрпағыңның бақытын, қуанышын ұзақ көруді Алла Тағала нәсіп етсін!
Табиғат дарытқан барлық қасиетіңмен жарқырап өмір кешіп, ғұмырың ұзақ болсын, ата!
Немереңіз
Жаухаз ТӨРЕБЕК
