Түркияның Әділет министрлігі жер сілкінісіне байланысты қылмыстарды тергеу үшін арнайы бөлімдер ашты. Бұл туралы Түркияның вице-президенті Фуат Октай мәлімдеді.
Оның айтуынша, ғимараттарды салу ережелерін бұзған 131 адам анықталды. Ғимараттар талапқа сай салынбағандықтан, жер сілкінісі кезінде қирап қалған. Вице-президенттің айтуынша, күдіктілердің бірі қамауға алынып, тағы 113 адамды қамауға алу туралы бұйрық берілген.
Соңғы мәліметтер бойынша, жер сілкінісі салдарынан қаза тапқандар саны 33 мыңнан асты. Тек Түркияда апаттан 6500 ғимарат қираған. Оқиға орнында 32 071 іздеу-құтқару тобы жұмыс істеп жатыр. Түркия президенті Режеп Тайып Ердоған бұндай жер сілкінісі 1939 жылдан бері болмағанын айтты. Елдің он провинциясында төтенше жағдай режимі жарияланды.
