Өнер • 13 Ақпан, 2023

«Армандастар» мәреге жетті

400 рет
көрсетілді
3 мин
оқу үшін

Қостанайда «Армандастар» облыстық балалар шығар­машылығы фестиваль-байқауы болды. Бұл жолы күй атасы Құрманғазының 200 жылдығына арналған дәстүрлі өнер мерекесіне 16 мектеп театры, 21 би тобы қатысты.

«Армандастар» мәреге жетті

Жас бишілер қалалық «Ми­рас» мәдениет үйінде өнер көр­сетсе, мектеп театрла­ры­ның сахналық қойылым­дары М.Горький атындағы гим­на­зияның мәжілісханасында өтті. Оқушылар қойған сахналық туындылардың тақырыбы сан алуан, ал бишілер «Халық биі» және «Заманауи стильдегі би» аталымдары бойынша өнер көрсетті. Байқауға Аман­гелді ауданынан келген «Гүл­дер-ай» бишілер тобы ұлт­тық нақыштағы ерекше киім үлгі­сімен көзге түсті. Ұлт ұс­тазы А.Байтұрсынұлына ар­налған күрделі қойылымды сәтті сахналап шыққан Тобыл қаласындағы Н.Наушабаев атын­дағы мектеп-гимназия­сының театры да көпшілік кө­ңілінен шықты. Аталған мек­тепте осыдан екі жыл бұрын «Қара шаңырақ» театры құрыл­ған. Оның құрамында отызға жуық оқушы бар.

Жас өнерпаздардың өнерін облысқа танымал мәдениет және өнер қайраткерлері ба­ға­лады. Нәтижесінде, қазылар алқасы «Үздік хореографиялық қо­йылым» аталымы бойынша Өңірлік психологиялық қол­дау және қосымша білім беру орталығының «Хамелеон» би то­бын жеңімпаз деп тауып, бо­лашақ ақпараттық технология мамандарын оқытатын «Озат» мектеп-лицей-интернатының «Blossom» би тобына сахналық шеберлігі үшін арнайы сыйлық беру керек деп ұйғарды. Ал Фе­доров аудандық балалар шығармашылық үйінің «Жа­ным» би тобы «Би қойылы­мы­ның ерекшелігі үшін» деген номинация жеңімпазы атанды.

Байқау қорытындысы бойынша би өнері мен театр өнеріне тағайындалған қос бір­дей бас жүлдені Амангелді ауданының өнерлі өрендері жеңіп алды. Бишілер арасынан Гран-При сыйлығын Амангелді орта мектебінің «Гүлдер-ай» ансамблі, ал оқушылар театр­ларының бас жүлдесін осы аудан­ға қарасты Құмкешу орта мек­тебінің «Бәйшешек» театры жеңіп алды. Үздік өнер топтары облыстық білім басқармасының мақтау қағаздарымен және ақшалай сыйлықтармен марапатталады. Бас жүлде иегерлері енді байқаудың республикалық кезеңінде өнер көрсететін болады. Ұйымдастырушылардың айтуынша, облыс оқушылары бұған дейін де республикалық байқауларда жақсы өнер көрсетіп, жүлделі орындардан көрініп жүр. «Мысалы, былтыр Жанкелдин ауданындағы өнер мектебінің театр ұжымы республика бойын­ша бас жүлдені жеңіп алса, хореография ұжымы үшінші орын алды. Бұл өнер фестиваліне балалардың қызығушылығы жылдан-жылға артып келеді. Биылғы байқауға алғаш рет өңірдегі мамандандырылған мекемелердің өнерпаздары да қатысып отыр, – дейді пси­хо­логиялық қолдау және қо­сым­ша білім беру өңірлік орта­лығы директорының орынбасары Жанна Есмұрзинова.

 

Қостанай облысы