Орал Ақшолақұлы Ақшолақов 1936 жылы 16 маусымда Гурьев қаласында елдегі алғашқы мұнай құбыры құрылысшысының отбасында дүниеге келді. Заманына сай оқып-жетіліп, бар ғұмырын жер қойнауын зерттеуге арнады.
Орал Ақшолақұлы 170-тен астам ғылыми мақала жариялады. Ол аса маңызды – «Қазақстан Республикасының көмірсутек әлеуетінің ғылыми негіздемесі» атты зерттеу еңбегі үшін 2015 жылы өзге авторлармен бірге Мемлекеттік сыйлыққа ие болды. Аталған іргелі еңбектің арқасында еліміздегі көмірсутек қоры 2012 жылғы деректермен салыстырғанда үш есе өсті.
Сонымен қатар Орал Ақшолақұлы ірі мұнай компанияларымен бірлесіп, саладағы басты бағдар болған Қазақстанда 2040 жылға дейін мұнай өндірудің толық болжамын жасады. Ғалым жер қойнауын пайдалану саласындағы көптеген заңды әзірлеуге де елеулі үлес қосты.
Бүгінде еліміздің түкпір-түкпірінде Орал Ақшолақовтың ізін жалғаушы шәкірттері, мұнайшы-геолог мамандар табысты еңбек етіп жүр. Ол ұстаз ретінде шәкірттерінің кәсіби тұрғыда ғана емес, жеке тұлға ретінде қалыптасуына да септесті.
Орал Ақшолақұлының ұзақ әрі жемісті еңбек жолында бірге қызмет еткен әріптестері оны еңбекқор, ашық мінезді, ақжарқын, өз елінің нағыз патриоты деп сипаттайды. Мұнай-газ саласының мақтанышы болған ғалым, геолог, қайраткер тұлға, майталман маманның еңбек жолы – дара да даңқты жол.
«ҚазМұнайГаз» ҰК АҚ ұжымы еліміздің мұнай-газ саласының ардақты ардагері Орал Ақшолақұлының өмірден өтуіне байланысты оның отбасы мен жақындарының қайғыларына ортақтасып көңіл айтады. Марқұмның жаны жәннатта болып, нұры пейіште шалқысын.
«ҚазМұнайГаз» ҰК АҚ ұжымы