Өнер • 16 Ақпан, 2023

Сұлулық рәмізі

273 рет
көрсетілді
4 мин
оқу үшін

«Астана Опера» балет труппасының жетекші солисі Бақтияр Адамжан Кипрде өтіп жатқан Celebrity ballet gala гала-балетінде табысты өнер көрсетті. Әлемнің әйдік жұлдыздарының орындауы асқақ өнер мерекесінің сәнін келтірсе, қазақ бишісі кештің фавориті болды. Ол көрермендерді өзінің актерлік шеберлігімен, ерекше мәнерімен таңғалдырды.

Сұлулық рәмізі

Айта кетейік, гала-балетке Ағылшын ұлттық театры, «Астана Опера», Үлкен театр, Кремль сарайы, Михайловский театры, Нидерланд ұлттық ба­леті, Берлин мемлекеттік ба­леті секілді әлем­нің же­ті театрынан 12 при­ма-бале­рина мен этуаль­дер қа­тыс­ты. Концерттің бі­рін­ші күнінде Лимассолдағы (Кипр) «Пат­тихио» театрын­да кө­рер­­мендерге классика­лық ­және заманауи балеттен үздік нөмір­­лер ұсынылды. Бұл бағдарла­ма­ны Гала­ның көр­кемдік жетек­шісі, Үлкен театр­дың премьері Игорь Цвирко жаса­ған. Ал 15 ақпанда отанда­сы­мыз ел астанасын­дағы Нико­сия муниципалдық теат­рын­да өнер көрсетті.

ывп

– Celebrity ballet gala ұйым­дастырушыларымен бұрыннан таныспын. Олар менің өнерімді бағалап, осы балет кешінің қо­нағы болуға шақырды. Мұнда дүние жүзінен үздік бишілер жиналды, оларды заманауи балет өнерінің қаймағы десек бо­лады. Осынау керемет мә­дени кешке қатысып, «Астана Опера» театрын таныстырып жат­қаныма қуаныштымын, – деді Қазақ­станның еңбек сіңірген қай­раткері Бақтияр Адамжан.

Кипрліктер оның орын­дауын­­дағы Сенкингтің музыкасына «In the wake» заманауи нөмірі мен Цезарь Пунидің «Эс­меральда» балетінен «Диана және Актеон» па-де-десін жылы қа­был­дады. «In the wake» нөмірін Бақтияр Адамжанға осыдан бір­неше жыл бұрын атақты заманауи қытайлық хо­реограф Исян Чжан арнаған болатын. Ал нө­мірдің басы мен соңын Бақ­тияр Адамжан өзі ойлап тапқан.

Жалпы, шетелдік сахналарда жиі өнер көрсететін Бақтияр Адамжан үнемі мамандар­дың жоғары бағасын алып жүр. Та­нымал балетмейстерлер оның техникасы мол екенін, ше­берлігін бірден бай­қай­ды. Кө­бісін бишінің биік секіру­ле­рі­нен бірде-бір дыбыс шық­пай­ты­ны таңғалдырады. Осы­лай ды­быссыз секіретін қабілеті үшін Бақтияр Адам­жан бірнеше Үлкен театрда «Мы­сық» деген ла­қап атқа ие болды.

«Астана Операның» жетек­ші солисі қай шығарманы орын­даса да, әрдайым ерлер биі­нің мәдениетін сақтайды. Жыл басынан бері балет жұлдызы бір­қатар халықаралық жобаға қа­тысып үлгерді. 28 қаңтар мен 4 ақпан аралығында ол сахна­дағы жұбы – «Астана Опера» театрының солисі Шұғыла Әдепханмен Сидней, Брисбен және Мельбурнде (Аустралия) өткен Ballet International Gala әлемдік шоуында өнер көрсет­ті. Балеттік жұп жасыл құр­лық тұр­ғындарын осымен үшінші ­рет таңғалдырып отыр.

Сондай-ақ Ballet International Gala-дағы өнері аясында Бақ­тияр Адамжан осы саладағы жас әртістерге шеберлік сағатын өт­кізді. Әңгіме барысында биші тамызда Аустралияға төртін­ші рет өнер көрсетуге шақыру алғанын айтты. Бұдан бөлек оны алдағы 1-2 сәуірде Италия­ның Болонья қаласында өтетін «Этуальдер» гала-концертінде күтеді.

– Алда көп жоспар бар. Түрлі халықаралық жобаларға қаты­су­ға шақыру түсіп жатыр. Қазан­­да Женевада Иоганн Себастьян Бахтың музыкасына «Жасөспі­рім және өлім» балетінің премьерасы өтеді, ол жақта да өнер көрсетуге ұсыныс алдым. Айтайын дегенім, жобалардың арасынан бедел­дісін таңдауға мүмкіншілік бар. Оларға «Астана Опера» театрынан әріптестерімді қатыстыруға тырысып жатырмын, – дейді ол.

Әлемнің әр түкпірінде өте­тін спектакльдер мен гала-кон­церттерден бөлек балет жұл­дызы театр репертуарындағы қо­йы­лымдарға да қатысады. Бақ­тияр Адамжан көрерменге нау­рыз­да ұсынылатын хореография жау­һары – М.Жаррдың музыкасына Р.Петидің «Париж Құдай ана­сының соборы» балетінде ­сах­­наға шығады.