Кәсіпкерлерге көмек

«Атамекен» кәсіпкерлер палата­сы­ның жергілікті филиалы бүгінде заманға сай трансформацияны бас­тан кешіруде. Жуырда мұнда бизнес өкілдерінің мәселелерін шешуге арналған бес бірдей комитет құрылды. Соның бірі – агроөнеркәсіптік кешен комитеті.

– Филиал комитеттері кәсіп­кер­ліктердің жеке және жүйелік мәсе­ле­лерін шешуге, олардың өнімдерін сырт­қы нарыққа шығаруға, біліктілігі мен бәсекеге қабілеттілігін арттыруға жәрдемдеседі. Павлодар облысының кәсіпкерлер палатасында бүгінде бес комитет құрылды. Олар түрлі бағыт бойынша бекітілген жұ­мыс жоспары мен ереже негізінде жұмыс істейді. Атап айтқанда, агро­өнеркәсіптік кешен, өнеркәсіп, құ­рылыс және ТКШ, туризм және қонақүй бизнесі, білім беру, сауда және қызмет көрсету салалары, – деді Павлодар облысы кәсіп­кер­лер палатасының директоры Серік Сәдуақасов.

Барлық комитеттің жұмысы биз­нес-қауымдастықтардың, кә­сіп­кер­лердің міндеттері мен мәсе­ле­лерін шешу үшін мемлекеттік билік органдарымен тиімді өзара іс-қи­мы­лы­на ба­ғыт­­талған. Әр комитеттің өз төра­ғасы және мүшелері бар.

Агроөнеркәсіптік кешен комите­ті­нің отырысында жергілікті шаруалар мен бизнесмендер ет бағытындағы ірі қара мал мен жылқы сатып алуға жұм­салған шығындарды өтеу сома­сын ұлғайту, асыл тұқымды мал са­тып алуға жұмсалған қаражатты және «Agroexportpavlodar» ЖШС-ның сыйақы мөлшерлемесін өтеу, «Пав­­­лодар» ӘКК» АҚ-мен ынтымақ­тас­тық шарттарын өзгерту, балық шаруа­шылығын өркендету үшін су айдын­дарының айналасынан жер беру мәсе­лелерін көтерді.

Салада ұзақ жылдан бері еңбек етіп келе жатқандардың айтуынша, өңір­дегі өзен-көлдерді балықтандыру бүгінде үлкен мәселеге айналып тұр. Бұған қоса рұқсат етілмеген мал жа­йы­­лымдары мен мал суару орында­рына бақылауды күшейту қажет. Ресейдің шекаралас аймақтарынан балық шабақтарын сатып алуға болады. Тек бұл жерде субсидиялардың төлемін максималды түрде арттырса деген өтініштерін жеткізді кәсіп­кер­лер. Оның үстіне су айдындары айналасына тиісті инфрақұрылым тарту, айлақтар салу, пирстер тұр­ғы­зу секілді мәселелерді қаржы ұйым­да­рының көмегінсіз шешу мүмкін емес. Комитет мүшелері көтерілген мәсе­лелерді назарға алатындарын уәде етті.

ПАВЛОДАР