Алимент төледің бе, азамат!

Орал қаласындағы «Атриум» сауда және ойын-сауық кешенінің алдында «Алимент төледің бе, азамат!» атты шара өтті. Батыс Қазақстан облыстық сот актілерін орындау департаменті мен қалалық прокуратура бірігіп ұйымдастырған осынау шараға «БҚО студенттер альянсының» еріктілері де жұмыла атсалысты. Шараның мақсаты – алимент төлеуден жалтарып жүрген «әкелердің» туған балаларына деген жанашырлық сезімдерін ояту, оларды құқықтық жауап­керші­лікке шақыру, қоғамның осы мәселеге назарын аудару. – Жыл басынан бері облыс­тық сот актілерін орындау депар­таментінде 6486 алимент өндіру фактісі тіркелген. Өкінішке қарай, перзенттеріне берешек әкелердің жартысынан көбі жауапкершіліктен жалтарып, қашып жүр. Соған сәйкес департаментте түрлі шара­лар қолға алынуда, – дейді алимент төлемдерін өндіру бөлімі­нің бас­шысы Светлана Фигловская. Жүргізілген тиісті шаралар­дың нәтижесінде жыл басынан бері 35 азамат әкімшілік жауапкершілікке тартылған. Оның 9-ы бес тәулікке әкімшілік қамауға алынса, 12-сіне айыппұл салынған. Сондай-ақ, мекен-тұрағы белгісіз 16 қашқын әкеге іздеу жарияланып, 7 адамның автокөлік жүргізу құқығына шектеу қойылған. Мұның сыртында биылғы жылдың бес айы ішінде сот шешімін орындамаған 870 азаматқа еліміз аумағынан сырт жерге шығуға шектеу қойылды. Фатихолла МАШТАХОВ, БҚО Сот актілерін орындау департаментінің қызметкері.