Кәсіпкер құқын қорғайтын «QR код»

Өткен жылдың өзінде кә­сіп­керлер тарапынан биз­нес­­ті қорғау желісі бойынша 462 өтініш түскен. Бизнес өкіл­­дерінің талап-тілектерін сара­ла­ған кәсіпкерлер палатасы биз­неске тосқауыл болған мұн­дай келеңсіз істердің ішін­де салықтық және кедендік әкім­ші­лендіру жүйесіне қа­тыс­ты – 11, жер мәселелері бойынша – 24, мемлекеттік органдардың әрекетіне байланысты 36 шағым түскенін айтады.

«Былтыр қала прокуратурасымен бірлесіп, кәсіпкерлік субъектілерін қылмыстық қуда­л­­ау аясына негізсіз тартуды анықтау бойынша біраз жұ­мыс атқарылды. Әсіресе құқық қорғау органдарының қызметіне қылмыстық қудалау желісі бо­йынша тексеріс кезінде, кә­сіп­керлікке заңсыз араласу жағ­дайлары назарға ілінді. Нәти­же­сінде қала прокуратурасы 21 қылмыстық істі өз бетінше тоқ­татты, 51 істі ескертуден ке­йін тергеу органдарының өзі тоқ­татуына тура келді. Себебі бұл қылмыстық істер заңсыз тергелген әрі кәсіпкерлердің құқы өрескел бұзылған. Аталған жұ­мыстар тұрақты негізде жүр­­гізілетін болады», деді Алматы қаласы кәсіпкерлер па­ла­­тасының бизнесті қорғау жө­нін­дегі сарапшысы Тимур Зейнешев.

Бұдан былай мұндай келең­сіз­діктердің жолын кесумен құ­ра­мына прокуратура өкілдері кіретін кәсіпкерлердің құқығын қорғау жөніндегі мобильді топ айналысады. Мобильді жұмыс тобы іскер азаматтардың құқын қорғауға арналған «QR код» жобасын таныстырды. Ендігі жерде заңсыз тексеруге тап бол­ған кәсіпкер QR-ды сканерлеу арқылы арнайы сайтта шағым қалдырып, жағ­дайға байланыс­ты фото, бейне­тү­сі­рілім түріндегі дә­лел­дерін жүк­тей алады. Цифр­лы техно­ло­гияның арқа­сында жолданған шағым тиіс­ті органға әп-сәтте түседі. Шағым иесімен про­куратура және кәсіпкерлер пала­та­сының өкілдері жарты сағат­тың ішінде кері байланыс орна­туға тиіс. Егер шағым расталса, мәселе мо­бильді топтың құзырына өте­ді.

Жобаны таныстырған Медеу ауданы прокурорының орынбасары Бауыржан Төлендинов, прокуратура кәсіпкерлік ны­сан­дардың бәріне QR-код орна­ластыруды жоспарлап отыр­ға­нын жеткізді. Осылайша, ша­һар­дағы дүкендер мен базарларда, дәріханалар мен сұлулық салондарында, тіпті фитнес ор­талықтары мен кәсіпкерлік кеңселерде QR-код орнатылмақ. Кәсіпкерлерден түскен барлық сигнал қала прокуратурасының дерекқорында сақталып, аудандар бойынша топтастырылады. Осылайша, бұл ақпарат прокуратура мен кәсіпкерлер палатасына дабылдарды тал­дау­ға және қаланың жүйелік проб­лемаларының тізілімін қа­лып­тас­тыруға сеп болмақ.

АЛМАТЫ