В.Путин кезекті жолдауын қазіргі әлемдік дағдарысқа тап келген күрделі кезеңде жолдап отырғанын айтып, сөзін Ресей мен Украина арасындағы мәселеден бастады. Ол бір жыл бұрын Украинға қарсы не үшін арнайы әскери операция бастағанын халқына түсіндіріп өтті.
Оның айтуынша, Ресей Украина халқымен қақтығысып жатқан жоқ, олар елдегі режім мен Батыстағы қожайындардың тұтқынына айналған. Үндеуінің басым бөлігінде екі ел арасындағы қақтығыс пен Америка, Батыс, НАТО-ның «теріс» әрекеттерін айтқан В.Путин сөзін халқына алғыс айтумен жалғастырды.
Сондай-ақ В.Путин «туған-туыстарынан, жақындарынан айырылған отбасыларға қолдау көрсету, олардың бала-шағасын өсіруге, тәрбиелеуге, білім мен кәсіппен қамтамасыз ету – біздің міндетіміз», деп арнайы мемлекеттік қор құрылатынын айтты.
Бұған қоса, Ресей президенті кешірім сұрады. Алайда кімдерден екенін айтпады. «Кешіріңіздер, бүгін барлығының есімін атай алмаймын. Мен осы үндеуімді әзірлеп жатқанымда батырлық көрсеткендердің ұзын тізімін жасадым, бірақ сөйлейтін сөзімнен алып тастадым, өйткені барлығының есімін атап өту мүмкін емес, аты аталмай қалған жағдайда адамдарды ренжітіп аламын ба деп қорықтым», деді В.Путин.
Елдің экономикалық жағдайы мен алдағы атқарылар жұмысына тоқталған Ресей президенті Қара және Азов теңіздеріндегі порттардың әлеуметін арттыруды көздеп отыр.
– Біз Қара және Азов теңіздеріндегі порттарға ерекше көңіл бөлетін боламыз. Қазірдің өзінде біраз жұмыс атқарылды. «Солтүстік-Оңтүстік» халықаралық дәлізіне де ерекше көңіл бөлуді жалғастырамыз. Мәселен, қазір Еділ-Каспий каналы арқылы 4,5 метрден кем емес кемелер әрі-бері қатынап жатыр. Бұл Үндістан, Иран, Пәкістан және Таяу Шығыс елдерімен іскерлік ынтымақтастықтың жаңа бағыттарын ашады. Біз бұл дәлізді дамытуды тоқтатпаймыз, – деді ол.
Ресей басшысы Оңтүстік-Шығыс Азия нарығына Қазақстан арқылы шығуға ниетті екенін де айтып өтті.
– Жаңа геосаяси жағдайға байланысты логистиканы өзге жолдармен дамытамыз. Мәскеу-Қазан автомагистралін Екатеринбургке, Челябинскіге, Түменге дейін ұзартып, одан әрі Иркутск пен Владивостокқа жеткіземіз, Қазақстанға, одан әрі Моңғолия мен Қытайға да шығуды ойластырамыз, – деді В.Путин.
Сонымен қатар жолдауда В.Путин АҚШ-пен Ядролық қаруды азайту туралы өзара келісімді (the New START nuclear arms reduction treaty) уақытша тоқтататынын хабарлады. Еске салсақ, 2010 жылы АҚШ-тың сол кездегі президенті Барак Обама мен Ресейдің сол кездегі президенті Дмитрий Медведев ядролық қаруды азайту туралы келісімге келіп, ресми құжатқа қол қойған еді.
Осындай басты мәселелерге тоқталған Ресей басшысы: «Ресей кез келген сынаққа қарсы тұрып, жауап береді, өйткені біз бәріміз бір елміз, бір үлкен және біртұтас халықпыз. Біз өзімізге, өз қабілеттерімізге сенімдіміз. Шындық біздің жағымызда», деп жолдауын аяқтады.
В.Путин осы кезекті жолдауын өткен жылдың желтоқсан айында жасауы керек еді, алайда сарапшылардың айтуынша, Ресей мен Украинадағы қақтығысқа байланысты кейінге қалдырылған.