Кандидаттар өтінім берген кезде шет тілінен емтихан тапсырғаны туралы сертификат ұсынады. Мәселен, ағылшын тілінде магистратураға түсушілер нәтижесі 9.0-ден кем дегенде 6.0 IELTS, PBT 677-ден 498, IBT 120-дан 60 TOEFL сертификаттарын, тағылымдамадан өтушілер IELTS 5.0, PBT-417, IBT-35 TOEFL, DET 75 сертификаттарын ұсынуға тиіс.
– Биыл «Болашақ» бағдарламасының конкурстық іріктеу ережелері жетілдірілді. Бұл шара кандидаттардың құрамын сапалық жағынан арттыру үшін қабылданды. Шетелдік жоғары оқу орнының докторантурасына түсетін қазақстандықтарды қоспағанда, «Болашақ» үміткерлері шет тілін меңгерудің жоғары деңгейін растауы қажет, – деді Халықаралық бағдарламалар орталығының басқарма төрағасы Олжас Сәкенов.
Естеріңізге сала кетейік, 2020 жылдан бастап «Болашақ» стипендиясын тағайындау конкурсына жеңілдігі бар кандидаттарды қоспағанда, жетекші шетелдік жоғары оқу орнынан шартсыз шақыруы бар үміткерлер ғана қатыса алады. Сонымен қатар В1 және одан жоғары деңгейі бар мемлекеттік тілден емтихан тапсырғаны туралы ҚАЗТЕСТ сертификатын ұсыну талабы да қойылады.
Биыл «Болашақ» бағдарламасы аясында 555 стипендия бөлінді. Оның ішінде 395 стипендия магистратура/резидентура, 50 стипендия докторантура бағдарламаларына үлестірілген, сондай-ақ тағылымдамадан өту үшін 110 стипендия бөлінді.
Айта кетейік, құжат қабылдау және конкурстық іріктеу толығымен автоматтандырылған. Бұл халықаралық стипендия тағайындау конкурсының ашықтығын қамтамасыз етеді. Үміткерлер өңірлерден шықпай-ақ өтінім береді және іріктеудің барлық кезеңінен өтеді.
