Қазақтың саятшылық өнерін серік еткен құсбегілер сайысы Жаңаталап ауылы маңындағы «Құлагер» базасында өтті. Оған Астана, Алматы қалаларымен бірге Ақмола, Қарағанды, Жамбыл, Шығыс Қазақстан, Түркістан, Маңғыстау, Павлодар, Атырау, Абай, Жетісу, Ұлытау облыстарынан 50-ге жуық құсбегі қатысты. Құсбегілер 31 бүркіттің, 11 қаршыға мен 10 ителгінің томағасын сыпырып, сынға салды.
Чемпионаттың шешуші сынында 5 бүркіттің шеберлігі тексерілді. Ережеге сай сыннан өткен соң Астана қаласының тұрғыны Серікбек Күнтуған «Алғыр», атыраулық Арман Қошқаров «Нарын» бүркітімен үшінші жүлдеге ие болды. Сайысқа «Заңғар» бүркітін қосқан Абай облысының өкілі Ерзат Байқадамов екінші орынды иеленді. Ал елордалық Арманбек Күнтуғанұлы «Қарашолақ» қыранымен ел чемпионы атанды.
Қаршыға баптаған астаналықтар – Күнтуған Серікбек «Найзатұяқ», Құдайберген Рауилұлы «Чипок» аталатын құсымен үшінші орынның жүлдесін өзара бөлісті. Түркістан облысының тұрғыны Бағдат Кеуенов «Тарлан» қаршығасымен екінші жүлдеге қол жеткізді. Тағы бір түркістандық Дәурен Аршабай баптаған «Тұйғын» бірінші жүлдеге ие болды.
Ителгілер сайысының қызығы мол. Түркістандық қос құсбегінің ителгісі үшінші жүлденің иесі атанды. Олар – Ибрагим Базарбаевтың «Қаракөзі» мен Бағдат Кеуеновтің «Тұмары». Екінші орын Жамбыл облысынан қатысқан Бақдәулет Бабажанның «Қаракөз» атты ителгісіне берілді. Бірінші жүлдені Ақмола облысының намысын қорғаған Ерлан Кенжетаевтың «Ақбас» атауы бар ителгісі иеленді.
Атырау облысы
