Осы күндері Талғар ауданының Қайнар ауылдық округіне қарасты Жаңалық, Жалғамыс, Дәулет ауылдары мен Алматымен іргелес жатқан Бесағаш ауылының көшелеріне қар суы жайылып, аулаларды су басқан жағдайлар тіркелген. Көшеге жиылған судан жаяу жүргіншілердің жүріп-тұруы қиынға соғып, көліктерін айдалада қалдыруға мәжбүр болған тұрғындар бұл жайттың алғашқы рет емес, жыл сайын қайталанатынын айтып, дабыл қағуда.
– Балаларымызға жанымыз ашиды. Аяқтары малмандай су болып келеді. Олар түгілі өзіміз де әрлі-берлі өте алмай қиындық көрудеміз. Көктем келсе көл болатын ауылымыздың бұл қиындығына шыдамаған кей тұрғындар есіктерін жауып, пәтер жағалап кетеді, – дейді Жаңалық ауылының тұрғыны Әсия Маманова.
Дәл осылай батпаққа батып жүрген Жалғамыс, Нұра ауылдық округіне қарасты Өстемір ауылының тұрғындарында да маза жоқ. Ауыл көшелеріндегі қар суынан пайда болған көлшіктерден өте алмай, бала да, үлкендер де қиналып жүр.
– Көктем келсе, көрген күніміз осы. Күздің де жауын-шашынында балаларымыз батпаққа белшесінен батып, су болып жүреді. Аяқкиім шақ келмейді. Көлікпен жүру де мүмкін емес. Жаңақұрылысты былай қойғанда орталық көшелердің де күйі осы болып тұр. Ауыл жолдары қашан жасалып, қашан уайымнан, қиындықтан арыламыз? Ауылдық әкімдіктер не бітіріп отыр, бізге жаны ашитын үкімет бар ма? деп күйінеді Орал Айнабаев бастаған Жалғамыс ауылының бір топ тұрғындары.
Жалғамыс ауылы тұрғындарының басым бөлігі қоныстанған жаңақұрылыстағы көшелерге жыл сайын тас-құм төселгенмен, оны осындай жауын мен қар суы шайып кетеді. Былтыр Жалғамыс ауылының 4 шақырым жолына балас төселген. Бірақ одан келер қайран жоқ.
Күннің күрт жылуынан туындаған төтенше жағдай Жамбыл ауданының тұрғындарын да әуре-сарсаңға салып қойды.
– Қызыл суға қарсы әрекет етіп, бөгет жасағаннан қайыр болмай тұр. Таудан аққан қар суы өзенге айналып, қора-қопсымызды, ауламызды түгел басып жатыр. Жердің тоңы жібімегендіктен мамандардың жұмысына кедергі көп, – дейді Сарыбай би ауылының тұрғыны Айнұр Советханқызы.
Төтенше жағдайлар бөлімі мен ауылдық әкімдік мамандары, ауыл тұрғындары бірлесіп, Сарыбай би ауылындағы екі учаскеде су тасқынына қарсы жұмыстар жүргізуде. Қазақстан көшесі бойынша еріген судың алдын алу мақсатында тұрғын үйдің аумағы 40 қапшықты инертті материалдармен нығайтылған. Сондай-ақ суды бұру үшін ұзындығы шамамен 50 метр болатын уақытша арық желісі қазылды.
Бұл жұмыстарға жергілікті атқарушы органдардың 8 адам және 1 бірлік техникасы, №28237 әскери бөлімнің 3 қызметкері және 3 бірлік техникасы, ТЖ департаментінің 2 қызметкері және 1 бірлік техникасы жұмылдырылғаны жайлы Алматы облысы төтенше жағдайлар департаментінің баспасөз қызметі хабарлады.
Сонымен қатар соңғы мәліметтер бойынша Талғар ауданы Бесағаш ауылдық округіндегі су басқан аймақтарда суды сыртқа айдау жұмыстары жалғасуда.
Өңірде 2022 жылы 34 қауіпті учаске анықталған. Оған жергілікті атқару органдарынан қаражат бөлініп, 7 учаске толықтай жойылған. Қалған 27 қауіпті учаскеде биылғы жылы қаражат қарастырылса, тиісті жұмыстар атқарылатын болады.
Ұлбосын Исабек,
журналист
Алматы облысы
