Қоғам • 28 Ақпан, 2023

Азаматтық қоғамның алғышарты

436 рет
көрсетілді
2 мин
оқу үшін

Ақпарат және қоғамдық даму министрі Дархан Қыдырәлі елдегі бірқатар үкіметтік емес ұйым­дардың өкілдерін марапаттады. Дүниежүзілік үкіметтік емес ұйымдар күніне орай ұйымдастырылған іс-шарада Ақпарат және қоғамдық даму министрі аталған ұйымдар қызметінің ерекшелігін айтып өтті.

Азаматтық қоғамның алғышарты

– Кез келген мемлекеттің тірегі – азаматтық қоғам. Үкіметтік емес ұйым өкілдері халық пен билік арасындағы байланысты нығайтып, қоғамдық диалогтің қалыптасуына ықпал етеді. Мемлекет жыл сайын әлеуметтік маңызы бар 2 мың жобаны ҮЕҰ-мен өзара байланыс арқылы іске асырып келеді. Жүргізілген жұмыс нәтижесінде, 2022 жылы 500-ден астам жұмыс орны құрылды, 32 мыңнан астам бенефициар нақты көмек алды, оның ішінде 3000 ерекше қажеттілігі бар, 60-тан астам әлеуметтік қызмет пен орталық құрылды, – деді Дархан Қыдырәлі.

Министрліктің мәліметтеріне сүйенсек, қазіргі уақытта елімізде 22 мың­нан астам ҮЕҰ тіркелген, оның 17 мыңынан астамы белсенді жұмыс істейді. Сонымен қатар бүгінде азаматтық қоғам институттарын дамыту үшін министрлік жүйелі кешенді жұмыс жүргізіп жатыр. Мәселен, 2022 жылы 4 шілдеде волонтерлік және қайырымдылықты дамыту мәселелері жөнінде заң қабылданды.

– Осыдан біраз уақыт бұрын Қо­ғам­дық кеңестер мәселесі бойынша заң­намаға түзетулер енгізілді. Осы­лай­­ша, олардың қызмет аясын квази­мем­­лекеттік секторға дейін кеңейтуге мүмкіндік берілді. Қоғамдық кеңестер­дегі азаматтық сектордың үлесі 23,5 па­йыз­ға артып, қазіргі уақытта 86 пайызды құрады. Қоғамдық кеңестердің құрамы 90 пайызға жаңартылды, – деді министр.

Салтанатты жиын соңында Ақпарат және қоғамдық даму министрі Дархан Қыдырәлі үкіметтік емес ұйымдардың өкілдеріне алғыс білдіріп, марапаттады.